१६ जेठ, काठमाडौँ । पहिचान पक्षधरले कोशी प्रदेशमा बुधबारबाट घोषणा गरेको अनिश्चितकालिन आमहडताल फिर्ता लिएका छन् । आइतबार पक्राउ परेका २६ नेता तथा कार्यकर्तालाई नछाडेको भन्दै प्रदेश १ पुन नामाङ्कन संयुक्त संघर्ष समितिले बुधबारबाट अनिश्चितकालिन आमडहताल घोषणा गरेको थियो ।
मंगलबार दिउँसो जिल्ला प्रशासन कार्यालय मोरङमा भएको छलफलमा पक्राउ परेका कार्यकर्ता छाड्ने सहमति भएपछि आमहडताल फिर्ता भएको पहिचान पक्षधरका नेताले जानकारी दिएका छन् । बैठकमा आन्दोलनरत पहिचान पक्षधरको आन्दोलनलाई शान्तिपूर्ण बनाउने सहमति पनि भएको छ । सुरक्षा अधिकारी र आन्दोलनरत पक्षका प्रतिनिधिबीच भएको छलफलले आन्दोलनलाई शान्तिपूर्ण बनाउने सहमति गरेको हो ।
पहिचान पक्षधरले शान्तिपूर्ण कार्यक्रम सञ्चालन गर्ने र आन्दोलनका क्रममा पक्राउ परेका पहिचान पक्षधरलाई छाड्ने सहमति भएको मोरङका प्रमुख जिल्ला अधिकारी वीरेन्द्रकुमार यादवले जानकारी दिनुभयो । सहमतिपछि आइतबार पक्राउ परेका २६ जना आन्दोलनकारी छुटेका छन् । गत फागुन १७ गते प्रदेशसभा बैठकले प्रदेशको नाम कोशी राखेपछि पहिचान पक्षधर आन्दोलनमा छ। प्रदेशको पुनः नामकरण गर्नुपर्ने मागसहित प्रदेश नम्बर १ पुनः नामकरण संयुक्त संघर्ष समितिले आन्दोलन गरिरहेको हो ।
आइतबार प्रहरीले ८६ जनालाई पक्राउ गरेको थियो । ती मध्ये ६० जना सोही दिन राति छुटेका थिए। २६ जनालाई भने मुद्दा चलाउने भन्दै प्रहरीले छाडेको थिएन् । आन्दोलनरत पक्षसँगको छलफलपछि प्रहरी छाड्न तयार भएको हो । पहिचान पक्षधरहरुले आमहडताल फिर्ता भएपनि प्रदेशसभा केन्द्रित शान्तिपूर्ण आन्दोलन भने जारी रहने बताएका छन । बुधबार प्रदेशको दोस्रो तथा बजेट अधिवेशनको दोस्रो बैठक बस्दैछ । सो बैठकलाई लक्षित गरी शान्तिपूर्ण आन्दोलन गर्ने उनिहरुको भनाई छ। आइतबारको प्रदर्शनमा भने प्रहरी र प्रदर्शनकारीबची झडप भएको थियो ।
