काठमाडौं । संकटग्रस्त सहकारीका पीडित बचतकर्तालाई बचत रकम फिर्ता गर्ने प्रक्रिया अघि बढाइएको छ। संकटग्रस्त सहकारी व्यवस्थापन समितिका अनुसार पाँचवटा सहकारीका १३५ जना साना बचतकर्तालाई बचत रकम फिर्ता गरिएको हो।
समितिले लामो समयदेखि बचत रकम फिर्ता नपाएका साना बचतकर्तालाई प्राथमिकतामा राख्दै रकम फिर्ताको प्रक्रिया अघि बढाएको जनाएको छ। सहकारी क्षेत्रमा देखिएको समस्या समाधान गर्दै बचतकर्ताको रकम फिर्ता गर्ने उद्देश्यले प्रक्रिया अघि बढाइएको समितिको भनाइ छ।
पाँचवटा सहकारीबाट रकम फिर्ता पाउने बचतकर्ताको विवरण संकलन तथा आवश्यक प्रक्रिया पूरा गरी रकम उपलब्ध गराइएको हो। यससँगै अन्य सहकारीका पीडित बचतकर्तालाई पनि क्रमशः रकम फिर्ता गर्ने तयारी भइरहेको समितिले जनाएको छ।
सहकारीमा बचत गरेको रकम लामो समयदेखि फिर्ता नपाउँदा हजारौँ बचतकर्ता समस्यामा परेका छन्। विशेषगरी साना बचतकर्तालाई राहत दिने गरी रकम फिर्ताको कामलाई प्राथमिकताका साथ अघि बढाइएको समितिको भनाइ छ।
