काठमाडौँ । नेकपा एमालेका प्रमुख सचेतक ऐन महरले गृहमन्त्री सुधन गुरुङलाई सामाजिक सञ्जालमा भाइरल हुनेभन्दा टनेलमा फसेका नागरिकको जीवन रक्षा गर्न आग्रह गरेका छन् ।
बाढीपछि टनेलबाट सकुशल उद्धार गरिएका व्यक्तिलाई सुरक्षाकर्मी र स्वास्थ्यकर्मीले सुरक्षित हेलिकोप्टरतिर लगिरहेका बेला गृहमन्त्रीले स्लाइन बोकेर भिडिओ खिचेकोप्रति लक्षित गर्दै महरले यस्तो आग्रह गरेका हुन् ।
उनले लेखेका छन्, ‘गृहमन्त्री ज्यू ! प्लिज तपाई कमाण्ड सम्हालुहोस ,समन्वय गर्नुहोस् र सञ्चार गर्नुहोस् ,आवश्यक निर्णय गर्नुहोस् र सिङ्गो राज्यशक्ति र आवश्यकतामा जनशक्ति पनि परिचालन गर्नुहोस् । अरू टनेलमा फसेका नागरिकको उद्धार गर्न पहल गर्नु कम्तीमा मानवीयता छ भने । फसेका मानिसहरूको उद्धार गरेर जीवन रक्षा गर्न सकिने आशा पलाएको छ । आफ्ना नागरिकको जीवन रक्षा गर्नु राज्यको पहिलो र अनिवार्य कर्तव्य हो त्यसैले आवश्यक पर्यो भने अन्तर्राष्ट्रिय सहयोग पनि लिनु पर्यो । सम्बन्धित आयोजनाका प्राविधिक र निर्माणकर्ताहरू सँग छलफल गर्नुहोस् । हामी सँग राहत कोषमा मा अर्बौँ रकम मौज्दात छ त्यसैले विज्ञ तथा प्राविधिकहरू ल्याएर छिटो छिटो काममा लागौँ ।’
टनेलभित्र फसेका नागरिकको जीवन रक्षाका लागि एक-एक सेकेन्ड महत्त्वपूर्ण रहेको भन्दै महरले उपलब्ध जनशक्ति तथा स्रोत–साधन तत्काल परिचालन गर्न आग्रह गरेका छन्।
‘सबै टनेलमा एकै पटक काम थालौँ त्यहाँ फसेका नागरिकहरूको जीवन रक्षाका लागि एक एक सेकेण्डको महत्त्व छ । उपलब्ध जनशक्ति तथा स्रोत साधनको यथाशीघ्र परिचालन गरौँ । तपाई भाइरल यसै हुनुहुन्छ त । कति भाइरल हुन खोजेको हो र रु त्यो टनेल भित्र फसेका सबै नागरिकको जीवितै उद्धार गरे पछि तपाई यसै महान् हुनुहुन्छ मानिसहरू मेडियाहरु तपाईँलाई खोज्दै आउनेछन् । सारा दुनियाँले तपाईँको प्रशंसा र तारिफ गर्ने छ’, उनले लेखेका छन्, ‘तपाईँको काम त्यो अक्सिजन सिलिण्डर बोक्ने होइन । तपाइले गर्दा त्यहाँ काम गर्ने मान्छेलाई डिस्टर्ब भइरहेको छ । तपाई यहाँबाट गैदिनुहोस भनेर सेनाले अस्ति मात्रै भनेको किन बिर्सिनु भयो । त्यो सिलिण्डर बोक्ने काम त त्यहाँ खटिएको एक जना प्रहरी जवानले गरिहाल्नुहुन्छ नि । त्यसका लागि गृहमन्त्री चाहिँदैन । अहिले भाइरल हुनका लागि स्टण्ट गर्ने बेला होइन नागरिक जीवन रक्षा गर्ने बेला हो । उद्धार गरिएका नागरिकको उपचार चिकित्सकहरूले गर्नुहुन्छ तपाई अरू फसेका नागरिक को जीवन जोगाउन लागिदिनुहोस् प्लिज ।’
