काठमाडौँ । भोटेकोसी नदीमा बाढी आएको सातौँ दिन (मंगलबार) प्रभावित क्षेत्रमा रहेका विद्युत् आयोजनाका टनेल (सुरुङ) मा खोज तथा उद्धार कार्य जारी छ ।
भारतीय, चिनियाँ र दक्षिण कोरियनविज्ञ प्राविधिक टोलीको सहयोगमा नेपाली सेनाले टनेलमा खोज तथा उद्धार कार्यलाई जारी राखेको छ ।
नेपाली सेनाका अनुसार चिलिमे हाइड्रोमा विदेशीसहितको संयुक्त खोज तथा उद्धार टोलीले टनेलभित्र प्रवेश गरी करिब ५० मिटर भित्रसम्म पुगेर खोजी कार्य गरेको छ ।
नेपाली सेनाले मंगलबार जारी गरेको विज्ञप्ति अनुसार लाङटाङ हाइड्रोमा विदेशीसहितको संयुक्त खोज तथा उद्धार टोलीले टनेलभित्र करिब १५० मिटरसम्म प्रवेश गरी खोज तथा उद्धार कार्य गरेको छ ।
अपर त्रिशूली–१ हाइड्रोमा विदेशीसहितको संयुक्त खोज तथा उद्धार टोलीले टनेलको करिब २०० मिटरसम्म प्रवेश गरी खोजी कार्य गरेको छ ।
“त्रिशूली–३ ए मा टनेल हेड फेला परेको र कम्प्रेसरबाट हावा दिने कार्य गरेको छ । टनेलभित्रको पानी निकाल्ने कार्य भइरहेको छ । तीनवटा एक्साभेटर प्रयोग गरी पछाडीतर्फ रहेको वैकल्पिक मार्ग करिब १५ मिटर खोलिएको छ । रक ब्रेकरबाट टनेलभित्र छिर्ने स्थान बनाउन ढुंगा फुटाउने कार्य भइरहेको छ,” नेपाली सेनाको विज्ञप्तिमा उल्लेख छ ।
त्रिशूली–३ बी मा पनि विज्ञसहितको फौज खटिएको छ । टनेलमा प्रवेश गर्न प्रवेशद्वार पत्ता लगाई भित्र एक्साभेटर समेत प्रयोग गरी खन्ने कार्य भइरहेको छ ।
बाढीपछि तत्काल उद्धारको क्रममा विद्युत् परियोजनाहरूबाट २७९ जनाको उद्धार गरिएको छ । रसुवागढीबाट दुई, माथिल्लो त्रिशूली–१ बाट ३३, माथिल्लो त्रिशूली ३ ए बाट २२१, माथिल्लो त्रिशूली ३ बी बाट दुई, मैलुङबाट नौ, नुवाकोट सौर्य विद्युत् आयोजनाबाट चार, त्रिशूली जलविद्युत् आयोजनाबाट तीन र देवघाट जलविद्युत्बाट पाँचजनाको जीवित उद्धार गरिएको सेनाले जनाएको छ ।
