काठमाडौं,रसुवामा आएको बाढीपहिरोबाट प्रभावित नागरिकको उद्धार तथा राहतका लागि आर्थिक सहयोग उठाउने विषयलाई लिएर श्रम संस्कृति पार्टीका अध्यक्ष हर्क साम्पाङ विवादमा तानिएका छन्।
बाढी प्रभावित नागरिकलाई सहयोग गर्ने भन्दै साम्पाङले आर्थिक सहयोग संकलन गरेपछि सामाजिक सञ्जालमा त्यसको पक्ष र विपक्षमा बहस सुरु भएको छ। सरकारले विपद्का बेला एकद्वार प्रणालीमार्फत राहत तथा आर्थिक सहयोग संकलन गर्ने नीति अघि सारेका बेला साम्पाङले छुट्टै रूपमा सहयोग उठाएको भन्दै आलोचना भएको हो।
साम्पाङमाथि विपद्को समयमा समेत आफ्नो पार्टीको प्रचार गरेको आरोपसमेत सामाजिक सञ्जालमा लगाइएको छ। बाढी प्रभावित क्षेत्रमा उद्धार तथा राहतका लागि जाँदा पार्टीको झन्डा अंकित टिसर्ट प्रयोग गरेको विषयलाई लिएर पनि विभिन्न टिप्पणी भइरहेका छन्।
यसैबीच, साम्पाङ फेसबुक लाइभमार्फत सार्वजनिक हुँदै आफूलाई सहयोग गर्न चाहनेले सहयोग गर्न र नचाहनेले सरकारलाई सहयोग गर्न सक्ने भन्दै आक्रोशपूर्ण अभिव्यक्ति दिएका छन्। उनको अभिव्यक्तिलाई लिएर कतिपयले विपद्को संवेदनशील समयमा संयमता अपनाउनुपर्ने बताएका छन्।
साम्पाङले बाढीपहिरोको पूर्वसूचना र विपद् व्यवस्थापनमा सरकारको भूमिकामाथि समेत प्रश्न उठाएका छन्। सरकारले नागरिकलाई समयमै विपद्को जानकारी दिन नसकेको भन्दै उनले आक्रोश व्यक्त गरेका छन्। उनले चीनले समेत नेपाललाई समयमै विपद्को सम्भावित जोखिमबारे जानकारी नदिएको आरोप सामाजिक सञ्जालमार्फत लगाएका छन्।
विपद्को संवेदनशील समयमा राहत र उद्धारभन्दा राजनीतिक विवाद तथा आरोप–प्रत्यारोप हाबी भएको भन्दै सामाजिक सञ्जालमा साम्पाङको आलोचना भइरहेको छ। कतिपयले उनको पछिल्लो अभिव्यक्तिलाई ‘यस्तो समयमा पनि संयमता गुमाएको’ भन्दै टिप्पणी गरेका छन् भने केहीले भने प्रभावित नागरिकका लागि सहयोग जुटाउने प्रयासलाई राजनीतिक दृष्टिले मात्र हेर्न नहुने धारणा राखेका छन्।
रसुवा बाढीको पीडामा परेका नागरिकलाई तत्काल राहत र उद्धार आवश्यक भइरहेका बेला सहयोग संकलनदेखि राजनीतिक अभिव्यक्तिसम्मको विषय विवादमा तानिका छन्।
