काठमाडौँ । दुई वर्षीया बालिका गरिमा चौधरीको हत्याका मुख्य आरोपी बताइएका नाबालकको एउटा भिडियो सामाजिक सञ्जालमा भाइरल भइरहेको छ । भिडियोमा आरोपीसँग प्रहरीको उपस्थितिमा घटनाबारे सोधपुछ भइरहेको देखिन्छ ।
हातमा हत्कडी लगाइएका बालकले निर्धक्कसँग आरोप स्वीकार गरेका छन् । तर बालिकामाथि बलात्कार र हत्यामा आफू मात्र नभएर थप एक व्यक्ति संलग्न रहेको उनले बताएका छन् । सिमरा चोकमा घर भएका प्रदीप खड्काको योजना र संलग्नतामा यो सबै भएको उनको दाबी छ ।
भिडिओको सुरुमै सोफामा बसेका प्रहरीले गर्मी लागेको भन्दै एसी चलाउन आग्रह गर्छन् । तर आरोपी बालकले हाँस्दै आफूलाई जाडो लागिरहेको बताउँछन् । त्यसपछि अनुहार नदेखिएका व्यक्तिले घटनाबारे सबै विवरण सुनाएमा खाना खुवाउने आश्वासन दिएका छन् । प्रहरीले पनि लगेर खाना खुवाउने बताउँछन् । त्यसपछि आरोपी बालक घटनाबारे ढुक्कसँग बोल्न थाल्छन् । उनको अनुहारमा न अपराधबोध देखिन्छ, न सम्भावित सजायको त्रास ।
बालकले सुरुमै आफूलाई प्रदीप खड्का नाम गरेका साथीले उक्साएको बताउँछन् । सिमरा बस्ने प्रदीपलाई आफूले गाडीमा लिएर आएको र उसकै योजनाअनुसार बालिकालाई चकलेट दिएर लगेको उनको भनाइ छ ।
उनले भनेका छन्, ‘बच्चाहरू खेलिराख्या थिए । त्यो प्रदीप पनि त्यहीँ थियो । तिनीहरूले हेरिराथ्यो । म चकलेट किनेर आएँ अनि चकलेटको लालच दिएर एउटा घरमा लिएर गएँ त्यसलाई । त्यो घर कसको हो थाहा छैन ।’
बालिकासँग दुवैजनाले पालैपालो आपराधिक हर्कत गरेको आरोपी किशोरले सुनाएका छन् । बालिका बेहोस भएपछि प्रदीप भागेको उनको भनाइ छ । आफूले बालिकालाई त्यही घरमा रहेको डोरीले बाँधेर तन्नामा बेरेको अनि ढोकामा चुकुल लगाएर हिँडेको उनले बताएका छन् ।
भिडिओ सामाजिक सञ्जालमा आएपछि प्रहरीभित्र पनि आन्तरिक खोजीनिती सुरु भएको छ । संवेदनशील घटनामा प्रहरीको लापरबाही भएको अहिले सामाजिक सञ्जालमा टिका टिप्पणी भइरहेको छ । त्यो भिडियो कस्तो हो भन्ने विषयमा भने नेपाल प्रहरी बोलेको छैन ।
