काठमाडौँ । कानून, न्याय तथा संसदीय मामिला मन्त्री सोविता गौतमले ३ वर्षीया बालिका गरिमा चौधरीको बलात्कार र हत्याको जघन्य घटनालाई लिएर आफूमाथि मिडिया ट्रायल गर्न खोजिएको गुनासो गरेकी छन् ।
गरिमाका बाबुआमासँग सरकारले तीन बुँदे सम्झौता गरेपश्चात् उनले सामाजिक सञ्जालमा लामो स्टाटस लेख्दै यस्तो गुनासो गरेकी हुन् ।
गौतमले आफूले सडकको आक्रोश सुनेको बताउँदै आक्रोशभन्दा माथि कानून र विधी रहेकोले सोही अनुसार काम गर्नुपर्ने पनि बताएकी छिन् । उनले सडकको आक्रोश जति तीव्र भए पनि सरकारले संविधानभन्दा बाहिर गएर सजाय घोषणा गर्न नसक्ने र सरकारले गर्न सक्ने कानून निर्माणमा मन्त्रालयले गरिरहेको बताएकी छिन् ।
उनले गरिमाको घटनासँग जोडेर आफूमाथि मिडिया ट्रायल गर्न खोजिएको समेत बताएकी छिन् । घटनापछि उत्पन्न भएको जनआक्रोश स्वाभाविक भए पनि यसलाई राजनीतिकरण गर्न नहुनेमा मन्त्री गौतमको जोड छ ।
उनले लेखेकी छन्, ‘अनुसन्धान पूरा नहुँदै निष्कर्षमा पुग्ने र अपुष्ट विवरण फैलाउने प्रवृत्तिले न्यायलाई कमजोर बनाउँछ । प्रमाण एकपटक बिग्रियो भने त्यसको मूल्य पीडित परिवारले वर्षौँसम्म तिर्नुपर्ने हुन सक्छ । गरिमालाई साँच्चिकै न्याय दिन चाहन्छौँ भने यो घटनालाई अर्को मिडिया ट्रायल बन्न नदिऔँ ।’
यसबीच आफ्नो वर्षौँ पुरानो एउटा भिडियोको केही अंश काटेर आफ्ना राजनीतिक विरोधी केही मिडिया हाउस र पत्रकारले फैलाइरहेको गौतमले बताएकी छन् ।
उनी लेख्छिन्, ‘मैले निकै सानो उमेरमा बोलेका शब्दलाई सन्दर्भबाट अलग गरेर Clip काटेर ‘बलात्कार सामान्य हो’ भन्ने अर्थमा फैलाइएछ । त्यसबेला मैले भन्न खोजेको कुरा अर्कै थियो । हिंसामा परेकी महिलालाई समाजले फेरि लज्जा, दोष र सामाजिक बहिष्कारको सजाय नदेओस् । अपराधको लाज पीडितले होइन, अपराधीले बोक्नुपर्छ । पीडितले कानुनी न्याय पाउनै पर्छ, तर सँगै आफ्नो जीवन, आत्मसम्मान र आवाज यति निर्भयका साथ उठाउन सकुन् र यसरी आफूले आफूलाई बलियो बनाउन् कि कुनै सामाजिक लाञ्छनाले पनि उनीहरूलाई हल्लाउन नसकोस् भन्ने आशय र भाव थियो । जीवनमा कुनै छोरी मान्छेले बलात्कार ठिक हो भन्न सक्दैन ।’
