चितवन । चितवन जिल्लामा गत आर्थिक वर्ष २०८२/८३ मा बेपत्ता भएका ७६४ जनामध्ये ८९ जना अझै सम्पर्कमा आउन नसकेको जिल्ला प्रहरी कार्यालय चितवनले जनाएको छ। बाँकी ६७५ जनालाई विभिन्न स्थानबाट उद्धार गरी परिवारको जिम्मा लगाइएको छ।
जिल्ला प्रहरी कार्यालयका प्रमुख प्रहरी उपरीक्षक (एसपी) रामेश्वर पौडेलका अनुसार कतिपय व्यक्ति नारायणी नदीमा हामफालेपछि हराएको सूचना आउने भए पनि पछि उनीहरूको अवस्थाबारे जानकारी नहुँदा बेपत्ताको सूचीमा रहने गरेका छन्। त्यस्तै, घर फर्किएका कतिपय व्यक्तिले प्रहरीलाई जानकारी नदिने, सुरुमा दिएको सम्पर्क नम्बर परिवर्तन हुने वा सम्पर्कविहीन हुने कारणले पनि बेपत्ताको संख्या उच्च देखिने गरेको उनले बताए।
तथ्यांकअनुसार चितवनमा पछिल्ला तीन आर्थिक वर्षदेखि बेपत्ता हुने व्यक्तिको संख्या बढ्दो क्रममा छ। आर्थिक वर्ष २०८०/८१ मा ४८७ जना बेपत्ता भएकामध्ये ४७५ जना फेला परेका थिए भने १२ जनाको खोजी जारी थियो। आर्थिक वर्ष २०८१/८२ मा ५५३ जना बेपत्ता भएकामध्ये ५४० जना फेला परेका थिए भने १३ जना अझै सम्पर्कमा आएका थिएनन्। गत आर्थिक वर्ष २०८२/८३ मा यो संख्या बढेर ७६४ पुगेको छ, जसमध्ये ६७५ जना फेला परेका छन् भने ८९ जनाको खोजी जारी रहेको प्रहरीले जनाएको छ।
घरेलु हिंसाका उजुरी घटे
प्रहरीका अनुसार गत आर्थिक वर्ष २०८२/८३ मा ३८१ वटा घरेलु हिंसासम्बन्धी निवेदन दर्ता भएका छन्। तीमध्ये ३०५ वटा मिलापत्र भएका छन् भने ७१ वटा मुद्दा अदालतमा दर्ता गरिएको छ। पाँच वटा निवेदन अझै छलफलको क्रममा छन्।
यसअघि आर्थिक वर्ष २०८१/८२ मा ५४२ वटा घरेलु हिंसाका निवेदन परेका थिए। तीमध्ये ४६९ वटा मिलापत्र भएका थिए भने ७३ वटा अदालतमा पुगेका थिए। आर्थिक वर्ष २०८०/८१ मा भने ४९० वटा निवेदन दर्ता भएकामा ४११ वटा मिलापत्र र ७९ वटा अदालतमा दर्ता भएका थिए।
दुई हजारभन्दा बढी ठाडा उजुरी
गत आर्थिक वर्षमा चितवनमा २ हजार ३०५ वटा ठाडा उजुरी दर्ता भएका छन्। तीमध्ये १ हजार ८७८ वटा जिल्ला प्रहरी कार्यालयमा र ४२७ वटा जिल्ला प्रशासन कार्यालयबाट प्राप्त भएका थिए। कुल उजुरीमध्ये २ हजार १०८ वटा फर्छ्योट गरिएको छ भने १९७ वटा उजुरी अझै फर्छ्योट हुन बाँकी रहेको जिल्ला प्रहरी कार्यालय चितवनको तथ्यांकमा उल्लेख छ।
प्रहरीले बेपत्ता व्यक्तिको खोजी, घरेलु हिंसाका घटनाको समाधान र नागरिकका गुनासो सम्बोधनलाई प्राथमिकतामा राखेर काम गरिरहेको जनाएको छ।
