काठमाडौं । नेपाल शिक्षक महासंघले शिक्षा ऐन जारी गर्नुपर्ने लगायतका माग पूरा नभएको भन्दै भदौ महिनादेखि आन्दोलनमा उत्रिने निर्णय गरेको छ।
महासंघका महासचिव तुलाबहादुर थापाका अनुसार परिषद् बैठकले भदौबाट आन्दोलन गर्ने निर्णय गरेको हो। आन्दोलनको ठोस मिति, कार्यक्रम र स्वरूप भने महासंघको विस्तारित कार्यालय बैठकले तय गर्ने उनले बताए।
महासंघले लामो समयदेखि शिक्षा ऐन तत्काल जारी गर्न सरकारसँग माग गर्दै आएको छ। साथै, शिक्षा नियमावलीको १०औँ संशोधनमा समावेश गरिएका केही प्रावधानप्रति पनि महासंघले असहमति जनाएको छ। महासचिव थापाले संशोधित नियमावलीमा रहेका कतिपय व्यवस्था शिक्षकमैत्री नभएको भन्दै त्यसमा पुनर्विचार आवश्यक रहेको बताए।
महासंघले शिक्षक सरुवालाई व्यवस्थित बनाउन, विद्यालय कर्मचारी, बालविकास (ईसीडी) शिक्षक तथा अस्थायी प्रकृतिका शिक्षकहरूको उचित व्यवस्थापन गर्नुपर्ने माग पनि दोहोर्याएको छ। यी माग सम्बोधन नभए देशव्यापी आन्दोलनका कार्यक्रम सार्वजनिक गरिने महासंघको चेतावनी छ।
यसअघि पनि शिक्षा ऐनको माग राख्दै शिक्षकहरूले पटक–पटक आन्दोलन गर्दै आएका थिए। भदौदेखि पुनः आन्दोलनको घोषणा भएपछि सरकारले शिक्षकका माग सम्बोधन गर्न कस्तो कदम चाल्छ भन्ने चासो बढेको छ।
