काठमाडौं । प्रतिनिधिसभाका सभामुख डीपी अर्याल ले संसदीय समितिका सभापति र सचिवहरूलाई समितिको कामलाई थप प्रभावकारी, परिणाममुखी र समयबद्ध बनाउन निर्देशन दिएका छन्। उनले विधेयकहरू लामो समयसम्म समितिमा रोकिराख्ने प्रवृत्तिको अन्त्य गर्दै समयमै टुंगोमा पुर्याउन विशेष जोड दिएका छन्।
संसदीय समितिका सभापति तथा सचिवहरूसँग भएको छलफलमा सभामुख अर्यालले अनुगमन र अवलोकन स्पष्ट कार्ययोजना तथा कार्यविधिका आधारमा गर्नुपर्ने बताए। “अनुगमन र अवलोकन गर्दा निश्चित कार्यविवरण बनाएर कानुन र विधिको पालना गर्दै अघि बढ्नुपर्छ,” उनले भने।
सरकारलाई सुझाव तथा सल्लाह दिँदा पनि समितिहरूले आफ्नो संवैधानिक र कानुनी क्षेत्राधिकारभित्र रहेर तथ्यमा आधारित तथा कार्यान्वयनयोग्य सुझाव दिनुपर्ने उनको भनाइ थियो।
सभामुख अर्यालले विधेयकमाथि गहन र गुणस्तरीय छलफल गरी आवश्यक परिमार्जनसहित समयमै प्रतिनिधिसभामा पेश गर्न आग्रह गरे। छलफलमा संसदीय समितिहरूलाई प्रविधिमैत्री, स्रोत–साधन सम्पन्न र थप सक्षम बनाउने विषयमा समेत विचारविमर्श भएको थियो।
बैठकमा समितिका सभापति र सचिवहरूले पनि कार्यसम्पादन सुधार, स्रोत व्यवस्थापन तथा संसदीय गतिविधिलाई अझ प्रभावकारी बनाउने विषयमा आफ्ना सुझाव प्रस्तुत गरेका थिए।
