काठमाडौं । तराई–मधेशका विभिन्न जिल्लामा पछिल्ला दिनहरूमा देखिएको साम्प्रदायिक तनाव र हिंसात्मक घटनापछि राष्ट्रिय प्रजातन्त्र पार्टी (राप्रपा)ले आफ्नो पुरानो एजेन्डा हिन्दु राष्ट्र को बहसलाई पुनः अगाडि सारेको छ। पार्टीले पछिल्ला घटनाक्रमले नेपालमा हिन्दु राष्ट्रको आवश्यकताबारे गम्भीर राष्ट्रिय बहस सुरु गर्नुपर्ने आधार थप बलियो बनाएको दाबी गरेको छ।
शुक्रबार बसेको राप्रपाको केन्द्रीय कार्यसम्पादन समिति बैठकले सुनसरीसहित तराई–मधेशमा भएका घटनाप्रति गम्भीर चिन्ता व्यक्त गर्दै निष्पक्ष, स्वतन्त्र र विश्वसनीय अनुसन्धान गरी दोषीमाथि कानुनबमोजिम कारबाही गर्न तथा पीडितलाई न्याय दिलाउन सरकारसँग माग गरेको छ।
बैठकपछि प्रवक्ता मोहन श्रेष्ठ ले जारी गरेको विज्ञप्तिमा पछिल्ला वर्षहरूमा विशेषगरी तराई–मधेशका विभिन्न क्षेत्रमा हिन्दु चाडपर्व, धार्मिक यात्रा तथा महोत्सवका क्रममा पटक–पटक तनाव र हिंसात्मक घटना दोहोरिएको उल्लेख गर्दै यसको वास्तविक कारण, सुरक्षा व्यवस्थाको कमजोरी र प्रशासनिक जिम्मेवारीबारे गहिरो अध्ययन आवश्यक रहेको जनाइएको छ।
राप्रपाले यस्ता घटना दोहोरिन नदिन सर्वपक्षीय समिति गठन गरी तत्काल संवाद प्रक्रिया सुरु गर्न सरकारलाई आग्रह गरेको छ। साथै प्रत्येक नागरिकले संविधान र कानुनले दिएको अधिकारभित्र रहेर आफ्नो धर्म, संस्कृति र परम्परा निर्भयपूर्वक पालन गर्न पाउने वातावरण राज्यले सुनिश्चित गर्नुपर्नेमा जोड दिएको छ।
पार्टीले राज्यको उदासीनताका कारण सामाजिक सद्भावमा चुनौती थपिएको दाबी गर्दै दीर्घकालीन शान्ति र राष्ट्रिय एकताका लागि सबै पक्षलाई विश्वासमा लिएर ठोस पहल गर्न सरकारको ध्यानाकर्षण गराएको छ।
विज्ञप्तिमा राप्रपाले आफ्नो वैदिक सनातन धर्मसापेक्ष हिन्दु राष्ट्र को एजेन्डा कुनै समुदायको अधिकार सीमित गर्ने उद्देश्यले नभई नेपालको ऐतिहासिक पहिचान, सांस्कृतिक निरन्तरता, राष्ट्रिय एकता तथा सबै नागरिकको धार्मिक स्वतन्त्रता र समान अधिकारलाई संस्थागत गर्ने अवधारणाका रूपमा निरन्तर उठाउँदै आएको उल्लेख गरेको छ।
राप्रपाले पछिल्ला दुई दशकका राजनीतिक अभ्यास र हाल देखिएका सामाजिक घटनाक्रमले हिन्दु राष्ट्रबारे पुनः गम्भीर राष्ट्रिय बहस आवश्यक रहेको दाबी गर्दै संयम, सहिष्णुता र राष्ट्रिय एकताको पक्षमा उभिन सम्पूर्ण नागरिकसँग पनि आह्वान गरेको छ।
