काठमाडौं। सुनसरीबाट सुरु भएर मधेशका विभिन्न जिल्लासम्म फैलिएको तनावका बीच राष्ट्रिय स्वतन्त्र पार्टी (रास्वपा)का मधेश प्रदेशका सांसदहरूले गृहमन्त्री सुधन गुरुङको भूमिकामाथि गम्भीर प्रश्न उठाएका छन्।
सभापति रवि लामिछानेसँग भएको छलफलमा सहभागी सांसदहरूले पछिल्लो सुरक्षा अवस्थाबारे सरकारको कार्यशैलीप्रति असन्तुष्टि जनाउँदै गृहमन्त्रीले प्रभावित क्षेत्रका सांसदहरूसँग कुनै समन्वय वा छलफल नगरेको गुनासो गरेका हुन्।
छलफलमा सहभागी एक सांसदका अनुसार, सुनसरीबाट सुरु भएको घटनाले मधेशका विभिन्न जिल्लामा तनाव सिर्जना गरिसकेको अवस्थामा पनि गृहमन्त्रीले स्थानीय सांसदसँग आवश्यक परामर्श नगरेको भन्दै सभापति लामिछानेसमक्ष आक्रोश व्यक्त गरिएको थियो।
स्रोतका अनुसार सभापति लामिछानेले पछिल्लो घटनाक्रमलाई अत्यन्त संवेदनशील रूपमा लिएको बताउँदै सामाजिक सद्भाव कायम राख्न आवश्यक परे आफू स्वयं मधेश जाने तयारीमा रहेको धारणा पनि व्यक्त गरेका छन्।
रास्वपाले बढ्दो तनावका बीच सरकारलाई शान्ति–सुरक्षा प्रभावकारी बनाउन, स्थानीय जनप्रतिनिधिसँग समन्वय बढाउन र सामाजिक सद्भाव कायम राख्न तत्काल सक्रिय हुन आग्रह गरेको छ
