काठमाडौं। सुनसरीबाट सुरु भएको साम्प्रदायिक तनाव मधेशका विभिन्न जिल्लासम्म फैलिन थालेपछि राष्ट्रिय स्वतन्त्र पार्टी (रास्वपा)का सभापति रवि लामिछानेले मधेश प्रदेशबाट निर्वाचित पार्टीका करिब २० जना सांसदसँग आकस्मिक छलफल गरेका छन्।
रास्वपाका अनुसार छलफलको मुख्य विषय तराई–मधेशमा सामाजिक सद्भाव, शान्ति–सुरक्षा र सम्भावित जोखिमको अवस्था थियो। सभापति लामिछानेले तनाव थप नबढोस् र सामाजिक एकता कायम रहोस् भन्ने विषयमा सांसदहरूसँग विस्तृत छलफल गरेका हुन्।
छलफलपछि सांसद मनिष झाले जनकपुरलगायत मधेशका विभिन्न स्थानमा बजार र पसल बन्द रहेको, चोक–चोकमा विरोध प्रदर्शन भइरहेको तथा सुरक्षा अवस्था संवेदनशील बनेको जानकारी दिएको बताए। उनले संघीय सरकारबाट अपेक्षाअनुसार सक्रियता नदेखिएको भन्दै तत्काल प्रभावकारी कदम चाल्न आवश्यक रहेको धारणा राखे।
बढ्दो तनावका बीच रास्वपाले शान्ति, सद्भाव र नागरिक सुरक्षालाई प्राथमिकतामा राखेर सरकारलाई आवश्यक पहल गर्न आग्रह गरेको छ।
