काठमाडौं ।नेपाली कांग्रेसका सभापति गगन थापाले जङ्गल, जमिनलगायत प्राकृतिक स्रोत–साधनको संरक्षण र राष्ट्रियकरण गर्ने अवधारणा जननायक बीपी कोइरालाले धेरैअघि नै अघि सारेको बताएका छन्।
बीपी कोइरालाको स्मृति दिवसका अवसरमा शुक्रबार पार्टीले आयोजना गरेको ‘ग्रिन रन’ प्रतियोगिताका विजयीलाई पुरस्कार वितरण कार्यक्रममा बोल्दै उनले जलवायु परिवर्तनबारे सचेतना फैलाउनुका साथै त्यसविरुद्ध ठोस सङ्कल्पका साथ अघि बढ्न कांग्रेस प्रतिबद्ध रहेको बताए।
हामी आज जलवायु परिवर्तनबारे सचेतना जगाउन मात्र होइन, यसको सामना गर्न सामूहिक सङ्कल्प गर्न पनि यहाँ उभिएका छौँ। यस विषयमा कांग्रेसले थप बृहत् कार्यक्रम अघि बढाउने तयारी गरेको छ,’ थापाले भने।
उनले बीपी कोइरालाले जङ्गल, जमिन र अन्य प्राकृतिक स्रोत–साधनको संरक्षण तथा राष्ट्रिय हितअनुसार उपयोग गर्ने अवधारणालाई दशकौँअघि नै स्थापित गरेको स्मरण गरे। दिगो विकास, प्राकृतिक स्रोतको संरक्षण र भावी पुस्ताप्रतिको उत्तरदायित्वको दृष्टिकोणलाई कांग्रेसले पुनः आत्मसात् गर्दै अघि बढ्ने उनले बताए।
थापाले समावेशिताको अवधारणालाई पनि बीपी कोइरालाले सात दशकअघि नै व्यवहारमा उतारेको उल्लेख गर्दै त्यसप्रति नेपाली कांग्रेस पूर्ण रूपमा प्रतिबद्ध रहेको धारणा राखे।
कार्यक्रमका अवसरमा जलवायु परिवर्तनसम्बन्धी चित्रकला प्रतियोगितासमेत आयोजना गरिएको थियो। सहभागीहरूलाई विभिन्न प्रजातिका बिरुवा वितरण गरिएको कांग्रेसले जनाएको छ। पार्टीका अनुसार बिरुवा वितरण कार्यक्रम सानेपास्थित केन्द्रीय कार्यालयबाट निरन्तर सञ्चालन गरिनेछ।
