ह्वील लक नियमित प्रक्रिया हो, आत्मदाह प्रयाससँग महानगरलाई जोड्न मिल्दैन’-महानगर प्रहरी प्रमुख

काठमाडौं । त्रिपुरेश्वरस्थित राहदानी विभाग अगाडि एक युवाले आत्मदाह प्रयास गरेको घटनापछि काठमाडौं महानगरपालिकाले आफ्नो नियमित कारबाहीलाई घटनाको प्रत्यक्ष कारणका रूपमा लिन नमिल्ने जनाएको छ।

महानगर प्रहरी प्रमुख विष्णुप्रसाद जोशीका अनुसार पार्किङ निषेधित क्षेत्रमा राखिएको मोटरसाइकलमा बिहान करिब साढे ११ बजे ह्वील लक लगाइएको थियो। सम्बन्धित व्यक्ति तत्काल सम्पर्कमा नआएकाले सवारीलाई हटाउने तयारी भइरहेका बेला उनी घटनास्थल फर्किएर आत्मदाहको प्रयास गरेका हुन्।

जोशीले सार्वजनिक सडक अवरुद्ध हुने गरी पार्किङ गरिएका सवारीमा ह्वील लक लगाउने कार्य दैनिक हुने नियमित प्रक्रिया भएको स्पष्ट पार्दै घटनाको वास्तविक कारण अनुसन्धानबाट खुल्ने बताए। उनले घटनाप्रति दुःख व्यक्त गर्दै महानगरलाई दोषी ठहर गर्नु उपयुक्त नहुने धारणा पनि राखे।