काठमाडौं । कृषि, वन तथा वातावरणमन्त्री गीता चौधरीले जलवायु परिवर्तनको चुनौती सामना गर्दै धान उत्पादनमा आत्मनिर्भरता हासिल गर्न आधुनिक प्रविधि, अनुसन्धान र सबै सरोकारवालाबीचको सहकार्य अपरिहार्य रहेको बताएकी छन्।
२३औँ राष्ट्रिय धान दिवस तथा रोपाइँ महोत्सवका अवसरमा शुभकामना सन्देश जारी गर्दै मन्त्री चौधरीले धान नेपालीको धर्म, संस्कृति र परम्परासँग जोडिएको महत्वपूर्ण बाली भएको उल्लेख गरिन्।
उनले स्थानीय तथा जङ्गली धानका जातको संरक्षण, संवद्र्धन र उपयोगले जैविक विविधता, जलवायु सहनशीलता तथा दीर्घकालीन खाद्य सुरक्षामा महत्वपूर्ण योगदान पुग्ने बताइन्।
‘जलवायुमैत्री प्रविधि, धानमा आत्मनिर्भरता र समृद्धि’ भन्ने यस वर्षको राष्ट्रिय धान दिवसको नाराले कृषि क्षेत्रका वर्तमान आवश्यकता र चुनौतीलाई सम्बोधन गर्न सहयोग पुग्ने विश्वास उनले व्यक्त गरिन्।मन्त्री चौधरीले चामलको आयात घटाउन वर्षे र चैते धानको खेती विस्तार, उन्नत जातको विकास, प्रविधि हस्तान्तरण, सिँचाइ सुविधाको विस्तार, उत्पादन सामग्रीमा सहज पहुँच तथा किसानलाई उचित मूल्य सुनिश्चित गर्नुपर्नेमा जोड दिइन्।
उनले धान उत्पादन वृद्धि गर्न खेतीयोग्य क्षेत्र विस्तारसँगै स्थानीय तथा जङ्गली धानका जातको पहिचान, सङ्कलन, संरक्षण र जलवायुमैत्री जात विकासलाई पनि प्राथमिकतामा राख्नुपर्ने बताइन्।
