चितवन। राष्ट्रिय स्वतन्त्र पार्टी (रास्वपा)को प्रथम राष्ट्रिय महाधिवेशनबाट विजय जैरु भारी मतसहित केन्द्रीय सदस्यमा निर्वाचित भएका छन्। प्रतिनिधिहरूको उल्लेखनीय समर्थन प्राप्त गर्दै उनी पार्टीको केन्द्रीय नेतृत्वमा पुगेका हुन्।
जैरु यसअघि प्रतिनिधिसभा निर्वाचनअघि पार्टीले सञ्चालन गरेको प्राइमरी निर्वाचनमा उत्कृष्ट मत ल्याउने नेतामध्येका एक थिए। तर, अन्तिम उम्मेदवारको सूचीमा भने उनी अटाउन सकेका थिएनन्। त्यसबेला उनको लोकप्रियता र योगदानका बाबजुद अवसरबाट वञ्चित भएको विषयले पार्टीभित्र र बाहिर व्यापक चर्चा पाएको थियो।
यसपटक महाधिवेशनमा भने प्रतिनिधिहरूले जैरुप्रति बलियो विश्वास व्यक्त गरेका छन्। भारी मतसहित उनको विजयलाई पार्टी संगठन निर्माणमा उनले पुर्याएको योगदान, निरन्तर सक्रियता र कार्यकर्तामाझ रहेको लोकप्रियताको सम्मानका रूपमा हेरिएको छ।
राजनीतिक वृत्तमा जैरुको निर्वाचनलाई रास्वपाभित्र उनको प्रभाव र स्वीकार्यता अझ सुदृढ भएको संकेतका रूपमा विश्लेषण गरिएको छ। केन्द्रीय सदस्यमा निर्वाचित भएसँगै उनी पार्टीको नीति निर्माण, संगठन विस्तार तथा सुदृढीकरण र आगामी राजनीतिक रणनीति निर्माणमा थप सक्रिय भूमिका निर्वाह गर्ने अपेक्षा गरिएको छ।
