यहाँ मिलाइएक
८ असार, चितवन ।** राष्ट्रिय स्वतन्त्र पार्टी (रास्वपा) को महाधिवेशन अन्तर्गत बन्दसत्र प्रतिनिधिहरूको नामावली टुंगो नलाग्दा निर्धारित समयमा सुरु हुन सकेको छैन।
आज बिहान साढे ८ बजे बन्दसत्र सुरु गर्ने कार्यतालिका भए पनि प्रतिनिधिहरूको नामावलीमा देखिएका त्रुटि सच्याउने काम नसकिएकाले कार्यक्रम प्रभावित भएको हो।
रास्वपा निर्वाचन आयोगका प्रमुख भुवन केसीका अनुसार प्रतिनिधिहरूको अन्तिम टुंगो लगाउने प्रक्रिया जारी छ। नाम, थर र ठेगानासम्बन्धी विवरण नमिलेकाले कतिपय प्रतिनिधिको परिचयपत्र (कार्ड) समेत तयार हुन सकेको छैन।
केसीले प्रतिनिधिहरूको अन्तिम सूची टुंगिएपछि मात्र बन्दसत्र सुरु हुने बताए। पार्टी स्रोतका अनुसार बन्दसत्र अपराह्नसम्म धकेलिन सक्ने सम्भावना रहेको छ।
विशेषगरी मधेसलगायत केही प्रदेशका प्रतिनिधिको विषयमा समेत विवाद देखिएको थियो। निर्वाचन समितिले आइतबार ४ हजार प्रतिनिधिको प्रारम्भिक नामावली सार्वजनिक गरे पनि त्यसमा देखिएका त्रुटि सच्याउने काम अझै जारी रहेको जनाइएको छ।
बन्दसत्र स्थल वरपर प्रतिनिधिहरूको उल्लेख्य उपस्थिति रहे पनि औपचारिक कार्यक्रम सुरु हुन सकेको छैन।
रास्वपाको बन्दसत्रमा केन्द्रीय समितिबाट पारित विधान संशोधन प्रस्ताव, सांगठनिक तथा राजनीतिक प्रतिवेदन तथा आर्थिक प्रतिवेदन पेश गर्ने कार्यसूची रहेको छ।
