काठमाडौँ । बहुचर्चित नक्कली भुटानी शरणार्थी प्रकरणको मुद्दामा जिल्ला अदालत काठमाडौँमा लगातार पाँच दिनदेखि सुनुवाइ भइरहेको छ। गत जेठ २७ गतेदेखि न्यायाधीश तेजबहादुर खड्काको इजलासमा मुद्दाको सुनुवाइ हुँदै आएको हो।
नेपाली नागरिकलाई नक्कली भुटानी शरणार्थी बनाएर अमेरिका लगायत विभिन्न देशमा पठाइदिने प्रलोभन देखाएर ठूलो रकम असुली गरिएको आरोपसँग सम्बन्धित यो मुद्दा लामो समयदेखि विचाराधीन थियो। जेठ २७ गतेबाट अदालतले मुद्दालाई पेसीमा राखेर निरन्तर सुनुवाइ अघि बढाएको छ।
यस प्रकरणमा २०८० जेठ १० गते पूर्वउपप्रधानमन्त्री तथा एमाले नेता टोपबहादुर रायमाझी, पूर्वगृहमन्त्री तथा कांग्रेस नेता बालकृष्ण खाँण, तत्कालीन गृहसचिव टेकनारायण पाण्डे, पूर्वसांसद आङटावा शेर्पा, तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईसहित ३० जनाविरुद्ध किर्ते, ठगी, संगठित अपराध तथा राज्यविरुद्धको अपराधसम्बन्धी कसुरमा जिल्ला अदालत काठमाडौँमा मुद्दा दायर गरिएको थियो।
अभियोगपत्रमा संगठित गिरोहले नक्कली कागजात तयार गरी नेपाली नागरिकलाई भुटानी शरणार्थीका रूपमा प्रस्तुत गर्दै विदेश पठाउने योजना बनाएको उल्लेख छ।
प्रकरणका मुख्य बिचौलिया केशव दुलाल, उनकी पत्नी दीपा हुमागाईँ, सानु भण्डारी, सन्देश शर्मा, टंककुमार गुरुङ, मोहनराज राई, निरञ्जनकुमार खरेल, केशव तुलाधर, हरिभक्त महर्जन, लक्ष्मी महर्जन, राजेश अर्याल, विनिता सावदेन लिम्बु, सागर राई, आशिष बुढाथोकी, सुनिल बुढाथोकी, रामशरण केसी, अशोक पोखरेल, गोविन्दकुमार चौधरी, धिरेन राई, बेचन झा तथा भुटानी शरणार्थी नेता टेकनाथ रिजालविरुद्ध पनि यही मुद्दा दायर गरिएको थियो।
मुद्दा दायर हुँदा पक्राउ परेका १८ जनामध्ये दुई जनालाई धरौटीमा र बाँकी १६ जनालाई थुनामा राखेर पुर्पक्ष गर्न आदेश दिइएको थियो। त्यसबेला १२ जना फरार रहेका थिए। पछि केही फरार प्रतिवादी पक्राउ परे पनि अझै केही अभियुक्त फरार अवस्थामै रहेका छन्।
यसैबीच, २०८१ वैशाख ९ गते केशव दुलालसहित पाँच जनाविरुद्ध र २०८१ साउन २९ गते बेचन झाविरुद्ध पूरक अभियोगपत्र दायर गरिएको थियो। थुनछेक बहस र आदेशबाहेक तीनवटै मुद्दालाई लगाउमा राखेर सुनुवाइ भइरहेको छ।
जिल्ला अदालतका तत्कालीन न्यायाधीश प्रेमप्रसाद न्यौपानेको इजलासले प्रारम्भिक प्रमाणका आधारमा अधिकांश प्रतिवादीलाई थुनामा राखेर मुद्दाको पुर्पक्ष गर्न आदेश दिएको थियो। पछि केही अभियुक्त उच्च अदालतबाट धरौटी वा तारेखमा छुटेका छन् भने केही अझै थुनामै छन्।
जिल्ला अदालतमा टोपबहादुर रायमाझी, उनका छोरा सन्दीप रायमाझी, बालकृष्ण खाँण, हज कमिटीका तत्कालीन अध्यक्ष शमशेर मियाँ, खाँणका स्वकीय सचिव नरेन्द्र केसी, तत्कालीन गृहसचिव टेकनारायण पाण्डे, आङटावा शेर्पा, तत्कालीन गृहमन्त्री रामबहादुर थापाका छोरा प्रतीक थापा, इन्द्रजित राई तथा उनका छोरा निरज राईसहितका प्रतिवादीविरुद्ध मुद्दा विचाराधीन छ।
