काठमाडौं । नेपाल–भारत द्विपक्षीय सीमा सुरक्षा बैठकमा सहभागी हुन भारतको उत्तराखण्ड र उत्तर प्रदेशका सीमा सुरक्षा अधिकारीहरूको टोली कञ्चनपुरस्थित गड्डाचौकी नाका हुँदै नेपाल प्रवेश गरेको छ।
कञ्चनपुरको भीमदत्तनगरमा आयोजना हुने बैठकमा नेपाल र भारतका सुरक्षा निकायका उच्च अधिकारीहरू सहभागी हुनेछन्। बैठकले सीमा क्षेत्रको सुरक्षा, व्यवस्थापन तथा समन्वयलाई थप प्रभावकारी बनाउने विषयमा केन्द्रित भएर छलफल गर्ने जनाइएको छ।
बैठकमा नेपाल–भारत सीमा क्षेत्रमा देखिएका विभिन्न समस्या, सीमा विवाद, सीमापार हुने आपराधिक गतिविधि, मानव बेचबिखन, लागुऔषध ओसारपसार तथा अवैध आवतजावत नियन्त्रणका विषयमा विस्तृत छलफल हुने कार्यक्रम रहेको छ।
यसका साथै सीमा क्षेत्रमा संयुक्त समन्वय, सूचना आदानप्रदान, सुरक्षा चुनौतीको सामना तथा सीमावर्ती क्षेत्रका नागरिकको सुरक्षासँग सम्बन्धित विषयमा पनि दुवै पक्षबीच विचारविमर्श हुने बताइएको छ।
नेपाल र भारतबीच नियमित रूपमा आयोजना हुँदै आएका यस्ता बैठकले सीमा व्यवस्थापनलाई व्यवस्थित बनाउन तथा दुई देशका सुरक्षा निकायबीचको सहकार्यलाई थप मजबुत बनाउन महत्वपूर्ण भूमिका खेल्दै आएका छन्।
दुवै देशका अधिकारीहरूले बैठकबाट सीमा सुरक्षासम्बन्धी साझा चुनौतीहरूको समाधान खोज्नुका साथै आपसी समन्वयलाई अझ प्रभावकारी बनाउने अपेक्षा गरिएको छ।
