राष्ट्रिय स्वतन्त्र पार्टी (रास्वपा) को लुम्बिनी प्रदेश सभापतिमा शालिकराम घिमिरे निर्वाचित भएका छन्। प्रारम्भिक मतदानमा सबैभन्दा बढी मत प्राप्त गरेका घिमिरेलाई प्रतिस्पर्धी गोपाल घिमिरेले समर्थन जनाएपछि दोस्रो चरणको मतदान नगरी नेतृत्व चयन भएको हो।
रूपन्देहीका घिमिरे यसअघि प्रदेश उपसभापतिको जिम्मेवारीमा थिए। उनी पार्टीमा कोषाध्यक्ष हुँदै उपसभापतिसम्मको यात्रा तय गरेका नेता हुन्।
शनिबार दाङको घोराहीस्थित उद्योग वाणिज्य संघमा सम्पन्न मतदानमा सभापतिका लागि ६ जनाबीच प्रतिस्पर्धा भएको थियो। कुल ५५२ मत खसेको निर्वाचनमा कसैले पनि आवश्यक ५१ प्रतिशत मत प्राप्त गर्न नसकेपछि दोस्रो चरणको मतदानको तयारी गरिएको थियो।
पहिलो चरणमा शालिकराम घिमिरेले १९९ मत प्राप्त गर्दै अग्रता लिएका थिए भने गोपाल घिमिरे ८७ मतसहित दोस्रो स्थानमा रहेका थिए। त्यसपछि गोपालले शालिकरामकै नेतृत्व स्वीकार गर्ने निर्णय गरेपछि पुनः मतदानको आवश्यकता नपरेको निर्वाचन अधिकृत गोकुल सापकोटाले जानकारी दिए।
सभापति पदका अन्य प्रतिस्पर्धीमध्ये गणेश पौडेलले ८४, डा. राजकुमार सुबेदीले ८०, मञ्जु भुसालले ७१ तथा अर्यालले १९ मत प्राप्त गरेका थिए।
यसैबीच, प्रदेश समितिका विभिन्न समावेशी तथा क्षेत्रगत सदस्य पदमा पनि निर्वाचन सम्पन्न भएको छ। थारू सदस्यतर्फ बिहारी चौधरी र गोविन्दबहादुर थारू निर्वाचित भए भने मधेसी सदस्यतर्फ गौतमप्रसाद पाण्डे र सञ्जयकुमार गुप्ता विजयी भएका छन्। मधेसी सदस्यमा नौसिन खातिमा निर्विरोध निर्वाचित भएकी छन्। खस–आर्य समूहका ८ सदस्य भने निर्विरोध चयन भएका छन्।
नयाँ नेतृत्व चयनसँगै रास्वपाले लुम्बिनी प्रदेशमा संगठन विस्तार र पार्टी गतिविधिलाई थप प्रभावकारी बनाउने अपेक्षा गरिएको छ।
