कपा एमालेका अध्यक्ष केपी शर्मा ओली ले उपाध्यक्ष विष्णु पौडेल र महासचिव शंकर पोखरेल प्रति असन्तुष्टि व्यक्त गर्दै उनीहरूलाई ‘लोभीपापी’को संज्ञा दिएका छन्। बागमती प्रदेशका नेता–कार्यकर्तासँग पुनर्गठन कार्यदलको छलफलपछि गुण्डुमा बोलाइएको बैठकमा ओलीले यस्तो टिप्पणी गरेको स्रोतले जनाएको छ।
बैठकमा कार्यदलको गतिविधिबारे जानकारी लिएपछि ओली पौडेल र पोखरेलप्रति आक्रामक रूपमा प्रस्तुत भएको बताइएको छ। उनका अनुसार, पदको लोभमा परेर महासचिव पोखरेलले पौडेललाई साथ दिइरहेका छन् भने पुनर्गठन अभियानमार्फत आफूलाई नेतृत्वबाट हटाउने प्रयास भइरहेको छ।
ओलीले आफूलाई हटाउन खोज्ने अभियान अन्ततः पार्टी विभाजनसम्म पुग्न सक्ने आशंका व्यक्त गर्दै ‘मलाई हटाउन के आधार छ? मैले के अपराध गरेको छु?’ भन्ने प्रश्नसमेत उठाएका थिए।
स्रोतका अनुसार ओलीले भदौ २३–२४ पछिका राजनीतिक घटनाक्रममा पौडेलले पार्टी, सरकार र नेतृत्वको पक्षमा खुलेर नबोलेको तथा अहिले पुनर्गठन अभियानको नेतृत्व गरिरहेको भन्दै असन्तुष्टि जनाएका थिए।
गुण्डु बैठकमा प्रदेश अध्यक्ष कैलाश ढुंगेल र काभ्रे जिल्ला सचिव राजकुमार सापकोटा ले पनि कार्यदलसँगको छलफलबारे जानकारी गराएका थिए। सापकोटाले कार्यदलविरुद्ध अभिव्यक्ति दिन नहुने भन्दै उपाध्यक्ष पौडेलले दिएको चेतावनीको प्रसंग उठाउँदै कार्यकर्ताबीचको असन्तुष्टि अध्यक्ष ओलीसमक्ष राखेका थिए।
