काठमाडौँ । अमेरिकी राष्ट्रपति जो बाइडेनले दोस्रोपटक राष्ट्रपतिमा लड्ने घोषणा गरेपछि पूर्वराष्ट्रपति डोनाल्ड ट्रम्प खुसी हुनुहुन्न । एक भिडियो सार्वजनिक गर्दै ८० वर्षे बाइडेनले आफूले सन् २०२४ मा हुने राष्ट्रपतिको निर्वाचनमा डेमोक्रेटिक पार्टीका तर्फबाट दोस्रोपटक लड्ने औपचारिक जानकारी दिनु भएको थियो ।
मंगलबार नै ७६ वर्षे ट्रम्पले पनि भिडियो सार्वजनिक गर्दै बाइडेनले चुनाव जितेमा देश कमजोर बन्ने र देशलाई रिपब्लिकन पार्टीले मात्र महान् बनाउन सक्ने उल्लेख गर्नु भएको छ । ४६औँ राष्ट्रपतिका रूपमा सन् २०२० मा निर्वाचित भएका बाइडेनले ४७औँ राष्ट्रपति बन्ने दौडमा आफ्नो चुनावी एजेन्डा गर्भपतनको अधिकार, लोकतन्त्रको रक्षा, मतदान अधिकार र सामाजिक सुरक्षालगायत हुने बताउनु भएको छ ।
आफूले देशमा अधिक स्वतन्त्रता दिन चाहेको बताउँदै उहाँले अब मतदाताको हातमा त्यसको जिम्मा भएको उल्लेख गर्नु भएको छ । अमेरिकामा दुई पटकसम्म एकै व्यक्ति राष्ट्रपति बन्न पाउने प्रावधान छ । वर्तमान उपराष्ट्रपति कमला ह्यारिसले पनि आफूले दोस्रोपटक उपराष्ट्रपतिको चुनाव लड्ने घोषणा गर्नु भएको छ । ५८ वर्षे डेमोक्रेटिक नेतृ ह्यारिस सन् २०२० मा पहिलो महिला उपराष्ट्रपतिका रूपमा निर्वाचित हुनु भएको छ ।
उता रिपब्लिकन पार्टीका तर्फबाट भने पूर्वअमेरिकी राष्ट्रपति डोनाल्ड ट्रम्प राष्ट्रपतिको उम्मेदवार बन्ने चर्चा छ । तर, ट्रम्पमाथि अहिले अदालतमा पोर्न स्टारलाई पैसा दिएर चुप लगाइएको विषयमा अनुसन्धान भइरहेको छ । ट्रम्पले पोर्न स्टारलाई भिन्न प्रयोजनमा पैसा दिएर व्यापारिक कार्यमा पैसा खर्च भएको भनेर अभिलेख राखेका छन्, जसलाई गैरकानुनी भनिएको छ ।
ट्रम्पले चुनावमा लड्ने घोषणा त गर्नु भएको छैन । यद्यपि, उहाँले मंगलबार बाइडेनको राष्ट्रपतीय उम्मेदवारीको विरोध जनाउनु भएको छ । ट्रम्पका अनुसार पाँच खराब राष्ट्रपतिले भन्दा बढी देशका लागि घातक काम बाइडेनले गर्नु भएको छ ।
बाइडेनकै समयमा शताब्दी यताकै खराब मुद्रास्फिति अमेरिकाले व्यहोरिरहेको र बैंकहरू डुब्न थालेको ट्रम्पको भनाइ छ । बाइडेन राष्ट्रपति बनिरहे डलरको मूल्य विश्वमा चाँडै कमजोर बन्ने पनि उहाँको भनाइ छ । आफ्नो पालामा अमेरिकी सीमाक्षेत्र सुरक्षित भएको उहाँको दाबी छ । हाल बाइडेनका कारण दक्षिणी सीमा क्षेत्रबाट अवैध आप्रवासीहरू अमेरिकी समुदायमा प्रवेश गरेको र ती मानसिबाट अमेरिकालाई खतरा भएको ट्रम्पको भनाइ छ ।
हाल अमेरिकामा घरबारविहीनता, लागु पदार्थ दुर्व्यसनी र हिंसात्मक अपराध बाइडेनकै प्रशासनमा व्याप्त भएको उहाँको आरोप छ । बाइडेनले विश्वलाई तेस्रो विश्वयुद्धतर्फ धकेलेको पनि ट्रम्पको भनाइ छ । रुस र चीनबीच बढ्दो सम्बन्धबीच र इरानले आणविक बम बनाइरहँदा बाइडेनको सरकारले केही गर्न नसकेको उहाँको भनाइ छ ।
ट्रम्पले भन्नु भएको छ, ‘तपाईंहरूको सहयोगले हामीले बाइडेनलाई पराजित गर्नेछौँ र अमेरिकालाई फेरि महान देश बनाउनेछौँ ।’
