धनुषा जिल्लाको मुखियापट्टी मुसरनिया गाउँपालिकामा पछिल्लो समय देखिएको परिवर्तनले स्थानीयवासीमा नयाँ आशा जगाएको छ। वर्षौंदेखि सार्वजनिक सडक, चौतारा तथा सरकारी जग्गामाथि हुँदै आएको अतिक्रमण हटाउने अभियानलाई गाउँपालिकाले तीव्रता दिएपछि गाउँपालिका अध्यक्ष जय कुमार यादव अहिले व्यापक चर्चामा आएका छन्।
अध्यक्ष यादवको नेतृत्वमा गाउँपालिकाले “सार्वजनिक सम्पत्ति संरक्षण र व्यवस्थित पालिका निर्माण” अभियान सञ्चालन गर्दै सडक किनारामा बनाइएका अव्यवस्थित टहरा, अस्थायी संरचना तथा गैरकानुनी अतिक्रमण हटाउने कार्यलाई आक्रामक रूपमा अघि बढाएको छ। लामो समयदेखि साँघुरा र अस्तव्यस्त बनेका सडकहरू अहिले खुला र व्यवस्थित देखिन थालेपछि स्थानीयवासी उत्साहित बनेका छन्।
स्थानीयहरूको भनाइ अनुसार, सडक विस्तारसँगै दैनिक आवतजावत सहज भएको छ भने कतिपय स्थानमा सार्वजनिक जग्गाको संरक्षणसँगै सौन्दर्यीकरणको कामसमेत सुरु गरिएको छ। वर्षौंदेखि “कसैले हात हाल्न नसकेको” विषयमा गाउँपालिकाले दृढ कदम चालेपछि जनस्तरमा यसको सकारात्मक प्रभाव देखिन थालेको छ।
युवा तथा ऊर्जाशील नेतृत्वका रूपमा परिचित अध्यक्ष जय कुमार यादव विकास निर्माणसँगै सामाजिक न्याय, समानता र शिक्षाको क्षेत्रमा समेत सक्रिय देखिएका छन्। दलित, विपन्न तथा पछाडि पारिएका समुदायलाई लक्षित कार्यक्रम, विद्यालय सुधार अभियान तथा जनतामुखी सेवाका कारण उनी स्थानीय जनतामाझ लोकप्रिय बन्दै गइरहेका छन्।
अध्यक्ष यादवले पालिकाभित्र सुशासन कायम गर्ने, सार्वजनिक सम्पत्तिको रक्षा गर्ने र विकासलाई व्यवस्थित ढंगले अघि बढाउने लक्ष्यसहित अभियान सञ्चालन गरिएको बताएका छन्। उनले कानूनविपरीत सार्वजनिक जग्गा अतिक्रमण गर्ने जो–कोहीमाथि आवश्यक कारबाही गरिने स्पष्ट सन्देशसमेत दिएका छन्।
धनुषा जिल्लामै उदाहरणीय काम गर्दै आएका अध्यक्ष यादवको यो कदमलाई धेरैले “स्थानीय तहको बालेन शैली” भन्दै प्रशंसा गरिरहेका छन्। दृढ नेतृत्व, स्पष्ट निर्णय क्षमता र जनताको पक्षमा काम गर्ने इच्छाशक्ति भए परिवर्तन सम्भव हुन्छ भन्ने सन्देश मुखियापट्टी मुसरनिया गाउँपालिकाले दिएको स्थानीयवासीको भनाइ छ।
आज मुखियापट्टी मुसरनिया केवल एउटा गाउँपालिका मात्र होइन, परिवर्तनको अभ्यास गरिरहेको एउटा उदाहरणका रूपमा चिनिन थालेको छ।
