विराटनगर । राष्ट्रपति रामचन्द्र पौडेलले संघीय लोकतान्त्रिक गणतन्त्र स्थापनापछि स्थानीय सरकारको भूमिका अझ महत्त्वपूर्ण र जिम्मेवार बनेको बताएका छन् ।
सुनसरीको कोसी गाउँपालिकामा नवनिर्मित लौकही सिटी हल उद्घाटन समारोहलाई बुधबार सम्बोधन गर्दै उनले जनताका आधारभूत आवश्यकता र अपेक्षाअनुसार विकास निर्माणका कामलाई तीव्रता दिनुपर्नेमा जोड दिए ।
राष्ट्रपति पौडेलले स्थानीय तह जनताको सबैभन्दा नजिकको सरकार भएकाले प्रभावकारी सेवा प्रवाह, सुशासन र विकास निर्माणमा सक्रिय हुनुपर्ने बताए । संघीय लोकतान्त्रिक गणतन्त्रको मूल्य र मान्यताअनुसार काम गर्दै जनविश्वास कायम राख्न स्थानीय तहहरू दत्तचित्त भएर लाग्नुपर्ने उनको भनाइ थियो ।
ग्रामीण क्षेत्रमा आधुनिक तथा बहु उपयोगी सिटी हल निर्माण हुनु सकारात्मक उपलब्धि भएको उल्लेख गर्दै उनले यसले संघ, प्रदेश र स्थानीय तहबिचको सहकार्यको उदाहरण प्रस्तुत गरेको बताए । उनले सप्तकोसी नदी किनार क्षेत्रको ऐतिहासिक, धार्मिक र पर्यटकीय सम्भावनाको चर्चा गर्दै बराहक्षेत्र, रामधुनी, पिण्डेश्वर, दन्तकाली र बुढासुब्बाजस्ता धार्मिक स्थललाई पर्यटनसँग जोडेर विकास गर्न आग्रह गरे ।
वि.सं. २०६५ सालमा कोसी बाँध फुट्दा विस्थापित भएको बस्ती पुनः स्थापित भई विकासका गतिविधि अघि बढेको देख्दा खुसी लागेको उल्लेख गर्दै उनले बाढी र विपद् जोखिम न्यूनीकरणका लागि पूर्वतयारीमा विशेष ध्यान दिन तीनै तहका सरकारलाई आग्रह गरे ।
उद्घाटन समारोहमा कोसी प्रदेशका मुख्यमन्त्री हिक्मतकुमार कार्कीले कोसी टप्पु वन्यजन्तु आरक्षको व्यवस्थापन तथा सञ्चालनको जिम्मेवारी प्रदेश सरकारलाई हस्तान्तरण गर्न संघीय सरकारसँग माग गरेका छन् ।
मुख्यमन्त्री कार्कीले प्रचुर पर्यटकीय सम्भावना हुँदाहुँदै संघीय सरकारको मातहतमा रहँदा कोसी टप्पुको अपेक्षित विकास र प्रवद्र्धन हुन नसकेको गुनासो गरे । यदि आरक्षको जिम्मेवारी प्रदेश सरकारलाई दिइए आवश्यक भौतिक संरचना निर्माण गर्दै जैविक विविधताको संरक्षणसहित यसलाई मुलुककै नमुना पर्यटकीय गन्तव्यका रूपमा विकास गर्ने प्रतिबद्धता उनले जनाए ।
