काठमाण्डौ। नेपाली कांग्रेसका पूर्वमहामन्त्री डा. शशांक कोइरालाले पूर्वउपसभापति पूर्णबहादुर खड्कालाई स्पष्टीकरण सोधेकोमा आपत्ति जनाएका छन् । बिहीबार एक विज्ञप्ति जारी गर्दै कोइरालाले यस्ताे आपत्ति जनाएका हुन् । पार्टीको आधिकारिकता विवाद अदालतमा विचारधीन रहेका बेला स्पष्टीकरण सोध्दा पार्टी एकतामा बाधक हुने उनको भनाइ छ ।
‘कांग्रेसको आधिकारिकता विवाद अदालतमा विचाराधीन अवस्थामा छ । यसै सन्दर्भमा पूर्णबहादुर खड्काज्यूलाई सोधिएको स्पष्टीकरण पार्टीभित्रको बृहत एकताका लागि बाधक बन्ने देखिन्छ,’ कोइरालाले जारी गरेको विज्ञप्तिमा भनिएकाे छ, ‘अदालतमा मुद्दा विधाराधीन रहेका बेला यस किसिमका आन्तरिक गतिविधिले पार्टी जीवनलाई थप संकटतर्फ धकेल्ने निश्चित प्रायः छ । तसर्थ, यो बेला पार्टीमा बृहत एकता कायम गर्न, गराउन अत्यावश्यक भएको छ । त्यसका लागि म प्रयत्नशील छु ।’
यद्यपि, पार्टीमा रुपान्तरण जरुरी रहेको उनको भनाइ छ । ‘कुनैपनि जीवन्त पार्टीभित्र सैद्धान्तिक मतभिन्नता हुनु स्वभाविक मानिन्छ । पटकपटक भएका आन्दोलन र विद्रोहपछि समयानुकूल रूपमा पार्टीका गतिविधि रुपान्तरित हुनुपर्छ भन्नेमा कुनै दुईमत छैन,’ शशांकले भनेका छन्, ‘यद्यपि, मूल घर नै तहसनहसको अवस्थामा पुग्दासमेत परिवारका सदस्यहरूबीच वैमनश्यता कायम राखेर रुपान्तरणको कुनै अर्थ हुँदैन । पछिल्लो समय कांग्रेसमा रुपान्तरणको जरुरी थियो, तर त्यसैका नाममा भएका गतिविधिले कांग्रेसलाई कुन अवस्थामा पुर्यायाे हामी सबै जानकार छौँ ।’
आन्तरिक विवादले पार्टीमात्रै होइन सिंगो मुलुकको लोकतन्त्र र व्यवस्थाप्रति नै असर पुग्न सक्ने जोखिम बढाएको उनको भनाइ छ । प्रतिकूल अवस्थामा पार्टीमा तल्लो तहदेखि शीर्ष तहसम्मै एकता अपरिहार्य भएको उनको भनाइ छ । अहिले सदस्यता अद्यावधिकको फेरबदल आवश्यक नभएको समेत उनको भनाइ छ ।
‘१५औँ महाधिवेशनका लागि क्रियाशील सदस्यताको नवीकरण भइसकेको अवस्थामा अहिले सदस्यता अद्यावधिकको अर्थ छैन । क्रियाशील सदस्यतामा अद्यावधिकको नाममा हुने फेरबदलले पार्टीभित्रको आन्तरिक लोकतन्त्र, निष्पक्षता र पारदर्शिता प्रभावित हुने देखिन्छ,’ शशांकले भनेका छन्, ‘अझै पनि नेपाली कांग्रेस सैद्धान्तिक र वस्तुगत रूपमा विभाजित भएको छैन भन्ने कुरामा म विश्वस्त छु र आम कांग्रेसजनलाई त्यो अनुभूत गराउँदै पार्टीको बृहत एकताका पक्षमा उभिन सबैलाई अपिल गर्दछु ।’
यसअघि बुधबार बसेको कांग्रेस अनुशासन समितिको बैठकले पूर्वकार्यवाहक सभापति पूर्णबहादुर खड्कालाई स्पष्टीकरण सोध्ने निर्णय गरेको थियाे ।
खड्काले आफूलाई कार्यवाहक सभापति उल्लेख गरेर विज्ञप्ति निकाल्ने गरेका थिए । तर, विशेष महाधिवेशनबाट चयन भएको गगन थापा नेतृत्वको नयाँ समितिले उनलाई कार्यवाहक नलेख्न भन्दै सचेत गराएको थियो ।
अटेर गरेपछि बुधबार स्पष्टीकरण सोध्ने निर्णय गरिएको हो । खड्कालाई स्पष्टीकरणको माैका दिएर कारबाही प्रक्रिया अगाडि बढाउन खोजिएको बताइएको छ ।
