फाल्गुन २७,काठमाडौं । इरानको आक्रमणमा परी युनाइटेड अरब इमिरेट्स (यूएई)मा मृत्यु भएका गोरखाका २९ वर्षीय दिवस श्रेष्ठको शव परिवारलाई बुझाइएको छ । परराष्ट्र मन्त्रालयले बुधबार आयोजना गरेको पत्रकार सम्मेलनमा सो जानकारी दिइएको हो ।
“इरानको आक्रमणमा परी यूएईमा केही दिनअघि गोरखाका एक युवकको मृत्यु भएको थियो । उहाँको शव नेपालमा ल्याएर परिवारलाई हस्तान्तरण भइसकेको छ,” परराष्ट्र मन्त्रालयको मध्य एसिया, पश्चिम एसिया र अफ्रिका महाशाखा प्रमुख रामकाजी खड्काले बताए ।
इरानको आक्रमणमा परी हालसम्म यूएईमा एकजनाको मृत्यु र १५ जना घाइते भएको उनले जनाए । एकजना मंगलबार घाइते भएका हुन् । घाइतेमध्ये १४ जना उपचारपछि फर्किसकेको र एक नेपाली उपचाररत रहेको उनले बताए ।
मध्यपूर्व तथा खाडी क्षेत्रमा रहेका नेपाली नियोगहरूले त्यहाँ रहेका नेपालीको उद्धारको लागि सहायता माग गरेको महाशाखा प्रमुख खड्काले जनाए । नियोगहरूले माग गरेअनुसारको प्रस्ताव अहिले मन्त्रिपरिषद्मा पुगेको बताइएको छ । “मध्यपूर्व तथा खाडी क्षेत्रमा रहेका सबै नेपाली नियोगहरू खुला छन्, काम गरिरहेका छन्,” उनले भने ।
