पौष २७ चितवन । नारायणगढ-मुग्लिन सडक खण्ड अन्तर्गत पर्ने सिमलतालबाट केही तल त्रिशूली नदीको तनहुँतर्फको किनारमा बसजस्तो देखिने धातु देखिएको छ । जिल्ला प्रहरी कार्यालय चितवनका प्रहरी प्रवक्ता डीएसपी रविन्द्र खनालका अनुसार चितवनतर्फबाट त्रिशूली किनारको पारिपट्टी झाडीमा बालुवाले पुरिएको अवस्थामा उक्त वस्तु देखिएको हो । उक्त स्थानमा तनहुँ र चितवन दुबैतर्फका प्रहरी जाँदै छन् । पुग्न कठिन हुने अप्ठ्यारो ठाउँमा टिनजस्तो वस्तु देखिएकोले प्रहरीले पुगेर बस हो होइन यकिन गर्न नसकिएको उनले जानकारी दिए ।
पारिबाट देख्नेहरूले भने डेढ वर्षअघि त्रिशूली नदीमा खसेको बस हुनसक्ने आशंका गरेका छन् । २०८१ असार २८ गते सिमलतालबाट पहिरोले बगाएर त्रिशूलीमा दुईवटा बस खसेको थियो । ती बस अहिलेसम्म भेटिएको छैन । भरतपुर महानगरपालिका-२९ सिमलतालबाट ६५ जना यात्रु बोकेका दुईवटा बस त्रिशूली नदीमा खसेर बेपत्ता भएको थियो । दुर्घटनामा ११ जनाको मृत्यु भएको थियो भने तीनजना घाइते भएका थिए । ५१ जना बेपत्ता थिए
