सुर्खेत । नेकपा एमालेको ११औँ महाधिवेशन प्रतिनिधि छानिँदा कर्णाली प्रदेशमा पुरानै अनुहारको हालीमुहाली देखिएको छ । यसअघि नै परीक्षण भइसकेका, लामो समयदेखि पार्टीकै विभिन्न तहमा बसेका र नेताहरूकै आसेपासेहरूलाई मात्रै प्रतिनिधिमा स्थान दिइएको युवा पुस्ताका नेताहरू बताउँछन् । एमालेको राष्ट्रिय महाधिवेशनका लागि कर्णालीबाट ११३ जना प्रतिनिधि छनोट भएका छन् । यहाँ १० जिल्लाका १२ वटा निर्वाचन क्षेत्रहरू छन् । ४० वर्षमुनिको नवयुवा प्रतिनिधि छनोट गर्ने भनिए पनि त्यसमा अधिकांश विगतदेखि नै पार्टीमा लागेका युवाहरूको सहभागिता रहेको हो ।
उदाहरणका लागि दैलेख क्षेत्र नम्बर २ मा ४० वर्ष मुनिको युवा क्लस्टरमा १७ जनाको दाबी थियो । तर, अन्तिममा खुलातर्फ फर्म भरेका सुशील कुमार थापालाई ४० वर्ष मुनिको युवा प्रतिनिधि बनाइयो । नेताहरूकै सरसल्लाहमा भागबन्डाका आधारमा थापालाई ४० वर्ष मुनिको प्रतिनिधि बनाइएको एक नेताले बताए । थापा २०७४ मै एमालेबाट कर्णाली प्रदेश सभाका सांसद भइसकेका व्यक्ति हुन् । उनी पार्टीकै प्रदेश कमिटीमा छन् । जबकि त्यहाँ भर्खरै विद्यार्थी राजनीतिमा उदाइरहेका आशालाग्दा युवाहरूको दाबी खेर गयो ।एमालेले नवयुवाहरूलाई पार्टीमा प्रवेश गराउने उद्देश्यसहित महाधिवेशन प्रतिनिधि छनोटमा ४० वर्ष मुनिका युवाहरूको सहभागिता सुनिश्चितता गरेको छ । तर, त्यसको व्यापक दुरुपयोग भएको युवासंघ कर्णाली प्रदेशका अध्यक्ष जीवन शाहीले बताए ।
यस्तै डोल्पामा विगतमा बेला पार्टीकै निर्णय विरुद्ध ‘फ्लोर क्रस’ गरेका र भ्रष्टाचारको मुद्दा समेत लागिसकेका नन्दसिंह बुढा प्रतिनिधि बनेका छन् । यस्तै, दैलेख—१, मा पार्टीकै योगदान गरेका बौद्धिक नेताहरू प्रतिनिधि बन्न छुट्दा निजी विद्यालय सञ्चालन गर्दै आएका नैनसिंह खत्री पहिलो प्राथमिकतामा परेर प्रतिनिधि बनेको एक नेताले बताए ।
