रौतहट। रौतहटको गौर नगरपालिका–९ मा शनिबार राति शंकास्पद अवस्थामा भेटिएको ठूलो सुटकेसभित्र २६ वर्षीया युवतीको शव फेला परेको छ।

Advertisement

जिल्ला प्रहरी कार्यालयका डीएसपी राजु कार्कीका अनुसार मृतक माधवनारायण नगरपालिका–२ महादेवपट्टीकी रुबीकुमारी साह हुन्। राति स्थानीयले सुटकेस देखेपछि प्रहरीलाई खबर गरेका थिए। तर अँध्यारो र सुरक्षा कारण प्रहरीले बिहान मात्र सुटकेस खोलेर शव फेला पारेको हो।

प्रहरीको अनुमान अनुसार घाँटी कसेर हत्या गरी शव सुटकेसभित्र राखिएको हुनसक्छ। घटनाको विस्तृत अनुसन्धान भइरहेको र शव पोस्टमार्टमका लागि जिल्ला अस्पताल गौरमा राखिएको प्रहरीले जनाएको छ।

स्थानीयका अनुसार रुबी साहको विवाह भारतको मुजफ्फरपुरमा भए पनि हाल माइती घरमै बस्दै आएकी थिइन्। उनको पारिवारिक सम्बन्धबारे अझै स्पष्ट जानकारी आइसकेको छैन।