जनकपुरधाम। नेपाल बैंक लिमिटेडको सप्तरीस्थित शाखा कार्यालयमा कार्यरत सुरक्षा गार्डको हतियार चोरी भएको घटनामा संलग्न रहेको आरोपमा प्रहरीले एक २० वर्षीय युवकलाई पक्राउ गरेको छ। पक्राउ पर्ने युवक सप्तरीको खडक नगरपालिका–६, वीरपुरका अपसाद अन्सारी रहेको जिल्ला प्रहरी कार्यालय सप्तरीले जनाएको छ।
प्रहरीका अनुसार, शुक्रबार बिहान करिब पौने ४ बजेको समयमा सिरहाको लहान नगरपालिका–३, हस्पिटल चोकस्थित इलाका प्रहरी कार्यालय लहानबाट खटिएको टोलीले शंकास्पद रुपमा हिँडिरहेका अन्सारीलाई नियन्त्रणमा लिई जाँच गर्दा चोरी गरिएको हतियारसहित फेला पारेको हो।
सुरक्षा गार्डबाट हतियार चोरी भएको घटना भने बिहीबार राति करिब साढे १२ बजेको समयमा भएको थियो। खडक नगरपालिका–७, कल्याणपुरस्थित नेपाल बैंक शाखामा कार्यरत सुरक्षा गार्ड प्रमोद चौधरी (३९) र पर्शुराम चौधरी (४४) सुतिरहेको समयमा चोरी भएको थियो। चोरी भएको सामग्रीमा एकनाले १२ बोरको सर्टगन (हथियार नम्बर ३८६२७३), सो हतियारमा लाग्ने २० राउण्ड गोली, दुई थान मोबाइल, डिजिटल तराजु र कालो झोला समेत रहेका छन्।
प्रहरी नायव उपरीक्षक तथा सप्तरीका प्रवक्ता जितेन्द्र बस्नेतका अनुसार चोरीको खबर पाउनासाथ जिल्लाभर हुलिया परिचालन गरी सूचना आदानप्रदानपछि अन्सारीलाई नियन्त्रणमा लिई जाँच गरिएको थियो। जाँचका क्रममा अन्सारीको साथबाट थप दुई थान ल्यापटप, दुई थान कम्प्युटर स्क्यानर, दुई थान खुकुरी, र कार्टिजसहितको हतियार फेला परेको प्रहरीको भनाइ छ।
हाल घटनाबारे थप अनुसन्धान भइरहेको र युवकको अन्य सम्भावित संलग्नता खुलाउन प्रयास भइरहेको प्रहरीको भनाइ छ।
