काठमाडौं । यो सप्ताह सेयर बजार २.९४ प्रतिशत अर्थात् ७७ अंक बढेको छ। गत सप्ताह २६११ अंकमा बन्द भएको सेयर बजार यो साता २६८८ अंकमा पुग्यो । नेपाल राष्ट्र बैंकमा गभर्नर नियुक्तिपछिको चर्चाले लगानीकर्तामा सकारात्मक भाव बढ्दा मार्केट बढेको बताइएको छ । यो साता मंगलबार सरकारले गभर्नरमा विश्वनाथ पौडेललाई नियुक्त गरेको हो ।
साताको पहिलो दिन आइतबार २.७९ अंक घटेको बजार सोमबार १९.३० र मंगलबार ४९.०९ अंक बढ्यो । बुधबार फेरि ७.९४ अंक घटेको बजार बिहीबार १९.०४ अंक बढ्यो।
मार्केट बढेपनि कारोबार रकममा भने धेरै अन्तर छैन । आइतबार ८ अर्ब ५० करोड, सोमबार ७ अर्ब ३५ करोड, मंगलबार ७ अर्ब ३१ करोड, बुधबार १० अर्ब ६९ करोड र बिहीबार ९ अर्ब ८२ करोडको कारोबार भयो ।
बैंकिङले उचाल्यो सेयर बजार
यो साता बैंकिङ सेक्टर सबैभन्दा धेरै ७.२२ प्रतिशत बढ्यो । बजारको सबैभन्दा बलियो सेक्टर भएकाले यसको सूचकले समग्र परिसूचकलाई नै उतारचढाव बनाउने गर्छ ।
बैंकिङ उच्च दरले बढ्दा यो साता मूल्य धेरै बढेका १० कम्पनीमा बैंकहरूकै वर्चस्व रह्यो । पाँच वाणिज्य बैंकको मूल्य ९ प्रतिशतभन्दा धेरै बढ्यो । सस्तो मूल्यका वाणिज्य बैंकमा बढी आकर्षण देखिएको छ ।
