काठमाडौं। भारत र पाकिस्तानबीचको सैन्य तनाव फेरि चुलिएको छ। शुक्रबार भारतीय सेनाले सार्वजनिक गरेको एक भिडियो क्लिपले पुनः सीमा क्षेत्रमा हिंसा चर्किएको संकेत दिएको छ। उक्त भिडियोमा पाकिस्तानको नियन्त्रण रेखा नजिकको संरचनामाथि गरिएको आक्रमण देखिन्छ, जसलाई भारतीय सेनाले ‘उचित जवाफ’को रूपमा व्याख्या गरेको छ।
भारतीय सेनाले सामाजिक सञ्जाल एक्स (पूर्व ट्विटर) मा पोस्ट गर्दै पाकिस्तानले नियन्त्रण रेखा उल्लङ्घन गरेपछि आफूहरूले रातभरि क्रमिक आक्रमण गरेको दाबी गरेको छ। भारतको तर्फबाट लगातार आक्रमण भएको आरोप लगाउँदै उक्त भिडियो ‘सैन्य प्रतिरोध’को प्रमाणको रूपमा प्रस्तुत गरिएको छ।
तर पाकिस्तानले भने आफूले कुनै आक्रमण नगरेको र भारतको उक्साहटपछि मात्र रक्षात्मक उपायहरू अवलम्बन गरेको जिकिर गरेको छ। अलजजिरा समाचार संस्थाका अनुसार पाकिस्तानी सेनाका प्रवक्ताले भारतका दाबीहरूलाई खारेज गर्दै कटाक्ष गरेका छन्, “भारतले चलचित्रको दुनियाँ छोडेर यथार्थमा फर्किनुपर्छ।”
पाकिस्तानी सेनाले चेतावनी दिँदै भनेको छ, “जब पाकिस्तानले जवाफ दिन्छ, त्यो विश्वलाई थाहा हुनेछ।” साथै, अमेरिकालाई जानकारी दिँदै पाकिस्तानले आफ्नो जवाफी कारबाही आत्मरक्षाको अधिकार अन्तर्गत रहेको स्पष्ट पारेको छ। भारतीय सञ्चारमाध्यमहरूले एक कदम अघि बढ्दै पाकिस्तानको एफ–१६ लडाकु विमान खसालिएको र एक पाइलट पक्राउ परेको खबर सार्वजनिक गरेका छन्। यद्यपि पाकिस्तानले ती सबै रिपोर्टलाई प्रचारबाजीको संज्ञा दिँदै खारेज गरिसकेको छ। यससँगै उसले भारतविरुद्ध उचित समय र स्थानमा ‘जवाफी कारबाही’ हुने चेतावनी दिएको छ।
पाकिस्तान र अमेरिकाबीच एफ–१६ लडाकु विमानसम्बन्धी अन्तिम प्रयोगकर्ता सम्झौता (End-user agreement) रहेको छ, जसअनुसार ती विमान भारतविरुद्ध प्रयोग गर्न नपाइने प्रावधान छ। भारतले उक्त सम्झौताका आधारमा अमेरिका समक्ष आपत्ति जनाउने संकेत दिएको छ।
भारतले सार्वजानिक गरेको भिडियो सामग्री
