काठमाडौं। ग्लोबल आइएमई बैंकले नेपाल क्लियरिङ हाउस लिमिटेड (NCHL) सँगको सहकार्यमा कार्डमा आधारित अनलाइन ग्लोबल पेमेन्ट गेटवे सेवा औपचारिक रूपमा सुरु गरेको छ।
नयाँ पेमेन्ट गेटवे सञ्चालनमा आएपछि बैंकका मर्चेन्टहरूले अब भिसा तथा मास्टरकार्डजस्ता अन्तर्राष्ट्रिय कार्डहरू प्रयोग गरेर देश–विदेशका ग्राहकबाट सजिलै भुक्तानी लिन सक्नेछन्। यस गेटवेको सुरुवातसँगै नेपालको ई–कमर्स कारोबारमा नयाँ अवसरको ढोका खुलेको बैंकले जनाएको छ।
ग्लोबल आइएमई बैंकका अनुसार यो सुविधा विशेष गरी ट्राभल एजेन्सी, होटल, एयरलाइन्स, अस्पताल तथा अन्य अनलाइन कारोबारमा संलग्न व्यवसायका लागि उपयोगी हुनेछ। गेटवेमार्फत स्वदेश तथा विदेश दुवैतर्फका ग्राहकहरूसँग डिजिटल कारोबार गर्न सकिने भएकाले मर्चेन्टहरूको व्यापार विस्तारमा सहयोग पुग्ने बैंकको विश्वास छ ।
गेटवेमा थ्रिडी सेक्योर्ड (3D Secure) प्रविधिको प्रयोग भएकाले अनलाइन कारोबारहरू अझ सुरक्षित हुने पनि बैंकले जनाएको छ।
नेपालमा बैंकिङ पहुँच विस्तारमा सक्रिय ग्लोबल आइएमई बैंकले हालसम्म ७७ वटै जिल्लामा सेवा विस्तार गरिसकेको छ। बैंकसँग ३५४ शाखा कार्यालय, ३८५ एटिएम, २२१ शाखा रहित बैंकिङ सेवा, ६८ एक्सटेन्सन तथा राजस्व संकलन काउन्टर र ३ वटा विदेशस्थित प्रतिनिधि कार्यालयसहित १,१०० भन्दा बढी सेवा केन्द्रहरू रहेका छन्।
सन् २०२४ का लागि बैंकले ग्लोबल फाइनान्स बेष्ट बैंक अवार्ड र युरो मनी अवार्ड फर एक्सलेन्स का दुई विधामा पनि अन्तर्राष्ट्रिय मान्यता प्राप्त गरिसकेको छ।
