नौ कारोबार दिनमा लगातार बढेको नेप्से परिसूचक दशौं दिन भने घटेको छ। प्राविधिक भाषामा यसलाई करेक्सन आएको मानिन्छ। बजार लगातार बढी मात्रै रहने नभएकोले यस्तो घटाइलाई करेक्सन भनिने गरिएको हो। लगातार बजार बढ्दा लगानीकर्ताहरूले नाफा भएका सेयर बेच्न थाल्दा आपूर्ति केही बढेर बजार घट्ने हुन्छ।
लगातार नौ दिन बढेको नेप्सेले एक सय ९८ अंक जोडेको थियो। सोमबार त्यसमध्ये केही अंक गुमाएको हो। सोमबार नेप्से परिसूचक १३.६२ अंकले घटेर २८७६.६६ विन्दुमा आइपुगेको छ। कारोबार रकममा सामान्य सुधार भएको छ। आइतबार १४ अर्ब २५ करोड रूपैयाँको सेयर कारोबार भएकोमा सोमबार १४ अर्ब २८ करोडको सेयर किनबेच भएको हो।
कुल कारोबारमा हिमालयन रिइन्स्योरेन्सको मात्रै ९.६६ प्रतिशत रकमको कारोबार भएकाे छ। कम्पनीको कुल एक अर्ब ३८ करोड रूपैयाँको कारोबार भएको हो। यसदिन कम्पनीले अन्तिम मूल्यको आधारमा पनि रेकर्ड बनाएको छ। बजार बन्द हुँदा कम्पनीको सेयर मूल्य एक हजार ९३ रूपैयाँ भएको छ। अन्तरदिनको कारोबारमा भने कम्पनीको सेयर मूल्य एक हजार एक सय रूपैयाँसम्म पुगेको थियो।
सोमबार गार्डियन माइक्रोलाइफ इन्स्योरेन्सको सेयर मूल्य सबैभन्दा धेरै १० प्रतिशतले बढेर सर्किट लागेको छ। कम्पनीको प्रतिकित्ता एक हजार दुई सय ५६ रूपैयाँमा सेयर कारोबार भएको छ। समाज लघुवित्तको सेयर मूल्य १० प्रतिशतले घटेर सर्किट लागेको छ। कम्पनीको दुई हजार आठ सय ६६ रूपैयाँमा सेयर कारोबार भएको छ।
यसदिन जीवन बीमा, उत्पादनमुलक, सामूहिक लगानी कोष, निर्जीवन बीमा र ‘अन्य’ समूहगत परिसूचक बढेका छन्।
तीन सय किसिमका सेयर तथा ऋणपत्र (स्क्रिप्स) कारोबारमा आएकोमा ९१ वटाको मूल्य बढेको र दुई सय दुई वटाको मूल्य घटेको छ।
