काठमाडौं – नेपालको लगातर कमजोर ब्याटिङ दोहोरिँदा नेपालले आईसीसी विश्वकप लिग–२ त्रिकोणात्मक एक दिवसीय सिरिजमा लगातार तेस्रो हार व्यहोरेको छ । आईतवार राित भएको नेपालले क्यानडासँग लगातार दोस्रो र जारी सिरिजमा तेस्रो हार भोगेको हो। सिरिजको पहिलो खेलमा क्यानडासँग १ सय ३ र दोस्रो खेलमा ओमानसँग नेपाल १ विकेटले पराजित भएको थियो ।
क्यानडासँगको दोस्रो खेलमा नेपाल पाँच विकेटले पराजित भयो ।नेपालले दिएको १ सय ८२ रनको मध्यम लक्ष्य घरेलु टोलीले ४२ ओभरमा ५ विकेट गुमाएर भेट्यो । क्यानडाका लागि नवनित ढलिवालले सर्वाधिक ८७ रनको महत्वपूर्ण योगदान लिए। उनले १ सय १३ बलमा ८ चौका र ४ छक्का प्रहार गरे। पारगत सिंहले ६४ रन थपे। उनले ८३ बलमा ७ चौका र २ छक्का प्रहार गरे।
हर्ष ठकेरले १३ र कप्तान निकोलस किर्टोन ११ रनमा नटआउट रहे। नेपालका सन्दीप लामिछानेले दुई विकेट लिए। करण केसी, ललित राजवंशी र गुल्सन झाले समान एक एक विकेट लिए। त्यसअघि क्यानडाको किंग सिटीमा टस जितेर ब्याटिङ गरेको नेपाल ४६.१ ओभरमा १ सय ८१ रन बनाउँदा अलआउट भयो। नेपालका लागि सन्दीप लामिछानेले सर्वाधिक ४९ रन बनाए ।
४८ बलमा ५ चौका र १ छक्का हानेका लामिछाने अर्धशतक बनाउन बाट १ रनले चुके । क्यानडाविरुद्ध खराब प्रर्दशन गरेको नेपाल एक समय २७.१ ओभरमा ८७-७ को स्थितिमा थियो । आठौँ विकेटका लागि सोमपाल कामी र सन्दीप लामिछानेले ५५ रनको साझेदारी गर्दै नेपालको इनिङ्स उकासे । सोमपाल २१ रन बनाएर आउट भए। गुलसन झाले ३४, करण केसी २४, आरिफ शेख र अर्जुन साउदले समान १० रन बनाए ।
नेपालको शीर्षक्रमको ब्याटिङलाइन फेरि ध्वस्त भयो । एक समय नेपाली टोली १२ ओभरको समाप्तीमा ५ विकेट गुमाउँदा ३६ रनको दयनीय अवस्थामा थियो । तर गुल्सन र आरिफले छैटौं विकेटका लागि ३४ रनको साझेदारी गरे । क्यानडाका लागि कलिम साना एक्लैले तीन विकेट लिए। हर्ष ठकेर र डिलोन हेलिगंरले समान २ विकेट लिए। प्रविन कुमार र सादविन जफरले एक–एक विकेट आफ्नो नाममा गरे ।
