काठमाडौं – नवराजपुर गाउँपालिकामा भ्रष्टाचार काण्डमा तत्कालीन अध्यक्ष, प्रमुख प्रशासकीय अधिकृत, उपभोक्ता समिति सदस्यसहित १४ जना दोषी ठहर भएका छन् । रामजानकी दलित आधारभूत विद्यालयमा अपुरो भवन निर्माणको झुठो विवरण दिएर भुक्तानी लिएको आरोपमा तत्कालीन गाउँपालिका अध्यक्ष विश्वमोहन यादव, उपाध्यक्ष शोभाकुमारी यादव, प्रमुख प्रशासकीय अधिकृत अमरेन्द्र कुसियैत, लेखापाल सोमप्रसाद आचार्यसहित अन्य १४ जनालाई विशेष अदालतले दोषी ठहर गरेको हो ।
२०७७/०७८ मा विद्यालय भवन निर्माणको लागि १४ लाख ५१ हजार ५५१ रुपैयाँको भुक्तानी दिइए पनि भवन भने बनेको थिएन । यो घटनामा उजुरी परेपछि अख्तियार दुरुपयोग अनुसन्धान आयोगले अनुसन्धान गरी भ्रष्टाचार आरोपमा ०८१ जेष्ठ २८ मा विशेष अदालतमा मुद्दा दायर गरेको थियो । अदालतले आज दोषीहरूमाथि सजाय सुनाएको छ ।
विशेष अदालतको फैसलामा प्रमुख प्रशासकीय अधिकृत कुसियैत र लेखापाल आचार्यलाई ३ महिना कैद र २ लाख ७ हजार रुपैयाँ जरिवाना तोकिएको छ भने अन्य दोषीहरूमध्ये वडा अध्यक्षहरू मदन यादव, मनोज यादव र खुशीलाल साहसहित उपभोक्ता समितिका सदस्यहरूलाई ३ महिना कैद र १० हजार रुपैयाँ जरिवाना सुनाइएको छ ।
यसैगरी, इन्जिनियर कृष्णा साह र सब-इन्जिनियर सन्तोष कुमार यादवलाई पनि गलत प्राविधिक मूल्यांकनका कारण ३ महिना कैद र १० हजार रुपैयाँ जरिवाना तोकिएको छ । उपभोक्ता समितिका अध्यक्ष लक्ष्मीनारायण मुखिया, कोषाध्यक्ष घुरनीदेवी मण्डल, र सचिव रामभरोस मुखियालाई झुठा बिल पेस गरेको आरोपमा दोषी ठहर गर्दै ३ महिना कैदको सजाय सुनाइएको छ ।
