धनगढी : सुदूरपश्चिममा नागरिक उन्मुक्ति पार्टीले सरकारमा सहभागी हुने/नहुने विषयमा डिल्लीबजार कारागारबाट निर्देशन तथा निर्णय आउने जनाएको छ। उन्मुक्ति पार्टीका प्रवक्ता दामोदर पण्डितले एमाले नेतृत्वको सरकार बनाउन गठबन्धनलाई समर्थन गर्ने बारे अहिलेसम्म कुनै निर्णय नभएको जानकारी दिए। उनका अनुसार आज बेलुकासम्म पार्टीका संस्थापकसमेत रहेका टीकापुर घटनामा दोषी ठहर भइ जेल जीवन बिताइरहेका रेशमलाल चौधारीले सो विषयमा निर्णय गर्नेछन्। ‘सुदूरपश्चिममा हामी निर्णायक छौ, सरकार निर्माणबारे विभिन्न दलहरूसंग छलफल भैरहेको छ। तर सहमति कतै भएको छैन। हाम्रो पार्टीले सरकारमा जाने/नजाने र एमाले नेतृत्वको गठबन्धनलाई सुदूरपश्चिममा समर्थन गर्ने वा नगर्ने विषयमा निर्णय लिइसकेका छैनौ। यसको निर्णय हाम्रो पार्टीका संस्थापक रेशमलाल चौधरीले लिनुहुन्छ’,उनले भने।
सरकारमा जाने अथवा नजाने र समर्थन दिने विषयमा अहिले पार्टीमा छलफल नै नभएको र डिल्लीबजार कारागारबाटै सो निर्णय हुने उनको भनाइ छ यसअघि नेकपा एमाले नेतृत्वको सत्तारूढ गठबन्धनले सुदूरपश्चिम सरकारको नेतृत्वबारे आलो-पालोको सहमति गरेको थियो। आइतबार बालुवाटारमा भएको गठबन्धनका शीर्ष नेताहरूको बैठकले सुदूरपश्चिम प्रदेश सरकारको नेतृत्वमा एमाले र माओवादी केन्द्रले आलोपालो गर्ने र नागरिक उन्मुक्ति पार्टीलाई उपसभामुख दिने प्रस्तावसहितको सहमति गरेको थियो।
जसअनुसार सुदूरपश्चिममा प्रदेश सरकारको नेतृत्व पहिलो चरणमा नेकपा एमाले र दोस्रो चरणमा नेकपा माओवादी केन्द्रले गर्नेछन्। तर, उन्मुक्तिका नेताहरू भने अहिले पनि आफूहरूको अडान नेतृत्व दाबीमै कायम रहेको र दलहरूबीच छ्लफल गरिरहेको बताउँछन्। सोही कारण यहाँ सरकार निर्माणमा ढिलाइ भइरहेको बताइन्छ। यद्यपि नेकपा एमालेका संसदीय दलका नेता राजेन्द्र रावलले भने अहिले सत्ता गठबन्धनमा रहेका सबै दलहरूबिच साझा सहमतिको वातावरण बनाउन छलफल चलिरहेको बताएका छन्। यस्तै उनले सहमति गरेर भोलि बहुमतसहित मुख्यमन्त्रीमा दाबी पेश गर्ने तयारी रहेको पनि बताए।
त्यसका लागि उनले नागरिक उन्मुक्ति पार्टीलाई मिलाउनुपर्ने देखिन्छ। यस्तै एमालेले उन्मुक्तिको आधिकारिक निर्णय कुरिरहेको जनाएको छ। सुदूरपश्चिममा नागरिक उन्मुक्तिले जसलाई समर्थन गर्छ उसैको सरकार बन्ने देखिन्छ। सुदूरपश्चिममा (भोलि) पुस २७ गते साँझ ५ बजेसम्म सरकारमा दाबी गरिसक्नुपर्ने छ। ५३ सदस्यीय प्रदेश सभामा सरकार गठन गर्न २७ सांसदको समर्थन चाहिन्छ। यहाँ सबैभन्दा ठूलो नेपाली कांग्रेससँग १९ सिट, माओवादी केन्द्रसँग ११, एमालेसँग १०, नागरिक उन्मुक्तिसँग ७, नेकपा (एकीकृत समाजवादी)का चार, राप्रपाका एक र एक जना स्वतन्त्र सांसद छन्।
