काठमाडौ – अज्ञात समूहले इन्धन बोक्ने ट्याङ्करका चालक र सहचालकमाथि धारिलो हतियार प्रयोग गरी घाइते बनाएको घटना सार्वजनिक भएको छ । आक्रमणमा परेका ना ६ ख ९४०६ नम्बरको ट्याङ्करका चालक हरेन्द्र देउवा, जो डडेल्धुराको गन्यापधुरा गाउँपालिका १ का २४ वर्षीय युवा हुन्, र सहचालक अनिल देउवा, कैलालीको गोदावरी नगरपालिका ४ निवासी २२ वर्षीय युवक हुन् ।
हाल उनीहरुको उपचार माया मेट्रो अस्पतालमा भइरहेको छ । घटना रातको ११:२० बजेतिर धनगढी उपमहानगरपालिका २ को रोडहाउस क्याफे नजिकैको ट्याङ्कर पार्किङ क्षेत्रमा भएको हो । दुई मोटरसाइकलमा आएका अज्ञात व्यक्तिहरुले धारिलो हतियार प्रयोग गरी आक्रमण गरेका थिए ।
ती मध्ये से ६ प ९३९७ नम्बरको बुलेट मोटरसाइकल र अर्को अल्फाबेट नखुलेको ३०३० नम्बरको मोटरसाइकल प्रयोग गरिएको थियो । आक्रमणपछि ती व्यक्तिहरु मोटरसाइकलमा फरार भएका छन् भने उनीहरुको खोजी जारी छ । प्रहरीले भने दुई व्यक्तिलाई नियन्त्रणमा लिएको जनाएको छ ।
जिल्ला प्रहरी कार्यालय कैलालीका प्रमुख एसपी पदमबहादुर विष्टका अनुसार ट्याङ्कर पार्किङसम्बन्धी विवादका कारण आक्रमण भएको प्रारम्भिक विवरण छ । एसपी विष्टले भने, “राति दुई जनालाई नियन्त्रणमा लिएका छौं । आज विस्तृत सोधपुछपछि घटनाको कारण खुल्नेछ ।”
आक्रमणकारीहरुले पार्किङमा रहेका चार वटा ट्याङ्करमा समेत तोडफोड गरेका छन् । क्षति पुगेका ट्याङ्करहरुमा ना ८ ख १४२५, ना ४ ख ३९२०, ना ४ ख २९६५ र ना ६ ख ९४०६ नम्बरका ट्याङ्करहरु रहेका छन् । घटनास्थल त्रिनगर प्रहरी चौकीबाट करिब डेढ किलोमिटर उत्तरमा अवस्थित छ ।
