काठमान्डौ – पाँचथर जिल्लाको फालेलुङ गाउँपालिका वडा नम्बर ५, आइतराज केरुङको घरमा बिहीबार दिउँसो ग्रिनेट विस्फोट हुँदा ४ जना बालबालिका घाइते भएका छन् । वडा अध्यक्ष भरतबहादुर खपाङ्गीका अनुसार, विस्फोटमा परेर घाइते भएका बालबालिकामध्ये ३ जनाको अवस्था गम्भीर छ भने एक जना सामान्य घाइते छन् ।
गम्भीर घाइतेहरूमा ११ वर्षीय दिपशन साँवा, २ वर्षीया प्रियसा साँवा, र ११ वर्षीय पवन राईलाई उपचारका लागि जिल्ला अस्पताल पाँचथर पठाइएको थियो । तर, दिपशन र प्रियसाको अवस्था गम्भीर भएकाले थप उपचारका लागि उनीहरूलाई विर्तामोडस्थित बी एन्ड सी अस्पतालमा रिफर गरिएको छ । सामान्य घाइते ७ वर्षीय दीपसन राईको स्थानीय स्वास्थ्य चौकी प्राङबुङमा उपचार भइरहेको छ ।
जिल्ला प्रहरी कार्यालय पाँचथरका प्रमुख हेमन्त भण्डारीका अनुसार, केरुङको घरमा अर्को विस्फोटक पदार्थ ‘होममेड ग्रिनेट’ पनि फेला परेको छ । विस्फोट भएको पदार्थ पनि ग्रिनेट नै भएको पुष्टि भएको छ । घटनाको थप अनुसन्धान गर्न नेपाली सेनाको टोलीलाई बोलाइएको छ, र सेना शुक्रबार मात्र घटनास्थलमा पुग्ने जनाइएको छ ।
