सप्तरीको हनुमाननगर कंकालिनी नगरपालिका १ स्थित कोसी पलार क्षेत्रबाट शिकार गरेर बँदेल मारेको आरोपमा पूर्व डीआईजीसहित १० जनालाई प्रहरीले पक्राउ गरेको छ । पक्राउ परेका व्यक्तिहरूमा नेपाल प्रहरीका अवकाश प्राप्त प्रहरी नायब महानिरीक्षक (डीआईजी) ज्ञानविक्रम शाह र नेपाल प्रहरीकै बहालवाला प्रहरी नायब निरीक्षक (सई) सञ्जय न्यौपाने रहेका छन् । न्यौपाने हाल मधेस प्रदेशको बर्दिबासमा कार्यरत छन् ।
प्रहरीले पक्राउ परेकाहरूको साथबाट २२ क्यालिबरको एक थान राइफल, राइफलको दुई थान म्यागजिन, १५ थान गोली, तीन थान वाइनाकुलर, एक थान ट्राइपोटर, एक थान फलामको हथौडा, एक थान खुर्पा, प्रदेश ३-०१-०२२ च ६८५५ नम्बरको स्कारपियो, को २ त ६९ नम्बरको ट्रयाक्टर र मारिएको बँदेल बरामद गरेको छ ।
जिल्ला प्रहरी कार्यालय सप्तरीका प्रहरी उपरीक्षक गजुसिद्धी बज्राचार्यका अनुसार पक्राउ परेकाहरूविरुद्ध वन डिभिजनसँग समन्वय गरेर विस्तृत अनुसन्धान भइरहेको छ ।
