काठमाण्डौ – कलैया उपमहानगरपालिकाको मुख्य बजार भरत चोकमा बिहिबार बेलुका करेन्ट लागेर एक प्रहरी जवान घाइते भएका छन् । चोकमा रहेको चापाकलमा पानी खान जाँदा काठमाडौंमा कार्यरत बाराको देवताल गाउँपालिका ६ बेनौलीगाउँ निवासी २४ वर्षीय प्रहरी जवान सन्देश यादव घाइते भएका हुन् ।
उनी बिदामा घर आउँदा कलैया बजार आइपुगेका थिए । उनको घर र कलैया १० किमीको दूरीमा पर्छ । करेन्ट लागेर ढलेपछि चोकमै श्रेष्ठ पत्रिका पसल अगाडि बसिरहेका स्थानीय पत्रकार शिवशंकर मिश्रले लट्ठीले करेन्ट भएको तार चुडाउँदै उद्धार गरेका थिए । घाइतेलाई तत्कालै प्रादेशिक अस्पताल कलैयामा उपचारको लागि भर्ना गरिएको थियो ।
उनको त्यहाँ प्राथमिक उपचारपछि थप उपचारका लागि नेसनल मेडिकल कलेज वीरगन्ज पुर्याइएको थियो । यादवको स्वास्थ्य अवस्था समान्य बन्दै गएको मेडिकलमा रहेको प्रहरी युनिटका प्रहरी हवल्दार श्याम पटेलले बताए ।
विद्युत् वितरण केन्द्र कलैयाका प्रमुख ऋषिकुमार वर्णवालले घटना बारे प्राविधिक खटाएर जाँचबुझ भइरहेको बताए । चापाकलनजिकै रहेको पोल ठड्याउने तार (स्टे वार) मा करेन्ट प्रवाह भएर करेन्ट लागेको जिल्ला प्रहरी कार्यालय बाराका प्रहरी प्रवक्ता प्रहरी नायब उपरीक्षक प्रकाश सापकोटाले बताए ।
