काठमाडौँ। राष्ट्रिय स्वतन्त्र पार्टी (रास्वपा) ले इलाम–२ को उपचुनावको प्रचारमा चार मन्त्रीहरूलाई पठाउने भएको छ । राष्ट्रिय स्वतन्त्र पार्टीले चार मन्त्रीहरूलाई उपचुनावका लागि इलाम पठाउने भएको हो ।
सोमबार बसेको उपसभापति स्वर्णिम वाग्ले, महामन्त्री मुलुक ढकाल, सांसद शिशिर खनाल र मन्त्रीहरूबिच बैठकले उपनिर्वाचनको प्रचार अभियानको कार्यतालिका तय गरेको छ ।
वैशाख १५ गते इलाम २ मा उपनिर्वाचन हुँदैछ। इलाम–२ मा पार्टीका उम्मेदवार मिलन लिम्बूको चुनावी प्रचार–प्रसारका लागि सभापतिसमेत रहेका उपप्रधान तथा गृहमन्त्री रवि लामिछानेसहित चार मन्त्री इलाम जाने महामन्त्री ढकालले बताए । उनका अनुसार लामिछानेले वैशाख ७, ८, ११ र १२ गतेको चुनावी सभालाई सम्बोधन गर्ने कार्यतालिका छ ।
यस्तै पार्टी सहमहामन्त्री तथा शिक्षा मन्त्री सुमना श्रेष्ठ वैशाख ५ र ६ गते चुनावी घरदैलो र कोणसभामा सहभागी हुनेछिन्। रास्वपा संसदीय दलका उपनेता समेत रहेका खेलकुद मन्त्री विराजभक्त श्रेष्ठ वैशाख ९ र १० गते इलाम जाने उनले बताए ।
उनका अनुसार श्रम मन्त्री डीपी अर्यालले ११ र १२ गतेको सभालाई सम्बोधन गर्ने कार्यतालिका छ। चुनावी कार्यक्रममा जाँदा मन्त्रीहरूले सरकारी सुविधा प्रयोग नगर्ने महामन्त्री ढकालले बताए।
