काठमाडौँ। गण्डकीमा सभामुखको हस्ताक्षर जुटाएर गरिएको दाबीका आधारमा मुख्यमन्त्री नियुक्ति गरिएको भन्दै प्रमुख प्रतिपक्षी दल नेपाली कांग्रेसले सर्वोच्च अदालत जाने तयारी गरेको छ ।
नेपाली कांग्रेस गण्डकी संसदीय दलका प्रमुख सचेतक नन्दप्रसाद न्यौपानेले मुख्यमन्त्रीको असंवैधानिक नियुक्तिको विरोध गर्दै सर्वोच्च अदालत जाने तयारी गरेको बताए ।
कांग्रेसले सभामुख तटस्थ रहनुपर्ने भन्दै गैर संवैधानिक रूपमा गरिएको हस्ताक्षरलाई मान्यता नदिन आग्रह गरेको छ । निवर्तमान मुख्यमन्त्री एवं प्रदेश सभाका कांग्रेस संसदीय दलका नेता सुरेन्द्र पाण्डेले आइतवार प्रदेश प्रमुखलाई पत्र लेखेर गैर संवैधानिक नियुक्ति नगर्न आग्रह गरेका थिए ।
आफूहरूको आग्रहविपरीत प्रदेश प्रमुखले मुख्यमन्त्री नियुक्त गरेपछि कांग्रेस सर्वोच्च जाने तयारी गरेको हो । ‘गैर संवैधानिक ढंगले गरिएको मुख्यमन्त्री नियुक्तिविरुद्ध हामी सर्वोच्च जाने तयारी गरेका छौं, भ्याएसम्म आइतवार नै रिट दर्ताको तयारी भएको छ’ एक सांसदले लोकान्तरसँग भने ।
मुख्यमन्त्री अधिकारीले आजै शपथ गरेर मन्त्रिमण्डल विस्तारको तयारी गरेका छन् ।
