काठमाडौँ । नेपाल प्रहरीका आईजीपी वसन्त कुँवरले सहकारी ठगी प्रकरणमा गृहमन्त्री रवि लामिछानेको संलग्नता नरहेको बताएका छन् ।
प्रहरी महानिरीक्षक कुँवरले सहकारी ठगी प्रकरणमा गृहमन्त्री समेत रहेका रवि लामिछानेको विषयमा ठाडो उजुरी मात्र परेको जवाफ दिएका हुन् ।
बुधबार बसेको संसद्को राज्य व्यवस्था तथा सुशासन समितिमा भएको छलफलमा आइजीपी कुँवरले सहकारी ठगी प्रकरणमा लामिछानेविरुद्ध ठाडो उजुरी परे पनि त्यसमा तथ्य प्रमाण केही नभएको बताएका हुन् ।
साथै उनले लामिछानेको समेत नाम जोडिएको सुर्यदर्शन सहकारी ठगी प्रकरणमा अहिलेसम्म ५ जना पक्राउ परेको जानकारी दिए । ‘सुर्यदर्शन ठगीमा ५ जना पक्राउ परेका छन् १५ जना फरार रहेका छन्’, आइजीपी कुँवरको भनाइ छ ।
त्यसअघि बैठकमा नेपाली काँग्रेसका सांसद दिलेन्द्र बडूले गृहमन्त्री लामिछाने प्रबन्ध निर्देशक रहँदाका बखत ग्यालेक्सी टेलिभिजनमा भएको सहकारीको लगानीबारे प्रश्न उठाएका थिए । ग्यालेक्सी टेलिभिजनमा १० करोड रुपैयाँ आएको को कि होइन ? भन्दै उनले एक करोड रुपैयाँ रवि लामिछानेको नाममा जम्मा भएको विषयमा सोधखोज गरेका थिए ।
