काठमाडौँ। धर्माशालामा आगलागी हुँदा तीन घर जलेर नष्ट भएका छन्। धनकुटा नगरपालिका–१० मा रहेको धर्म शालामा आगलागी हुदा तिन घर जलेको हो।
आगलागीबाट स्थानीय कमला मोक्तानको दुई तले घर पूर्ण रुपमा जल्दा १५ लाख बराबरको क्षति भएको छ । त्यस्तै, नियरमान मोक्तानका अढाई तले दुईवटा घर जलेर पूर्ण नष्ट हुँदा ३० लाख बराबरको क्षति भएको छ ।
त्यस्तै, चन्द्रकुमारी अधिकारीको घर आंशिक रुपमा क्षति हुँदा १ लाख क्षति भएको छ । रत्ना ठाडामगरको दुईवटा घर नष्ट हुँदा ५ लाख बराबरको क्षति भएको जिल्ला प्रहरी कार्यालय धनकुटाले जनाएको छ ।
आगो नेपाल प्रहरी, सशस्त्र प्रहरी, नेपाली सेना, स्थानीयको सक्रियता र धनकुटा नगरपालिकाको २ दमकलको सहयोगमा करिब ३ घण्टापछि आगो नियन्त्रणमा आएको छ ।
आगलागीबाट करिब ५१ लाख बराबरको क्षति भएको प्रहरीले जनाएको छ । आगोले स्थानीय कमला मोक्तानको घरको अगेनोबाट सल्किएको हुनसक्ने प्रहरीको अनुमान रहेको छ ।
