काठमाडौं । कांग्रेस केन्द्रीय सदस्य आरजु राणा देउवाले गत मंगलबारदेखि सुरु भएको कांग्रेस केन्द्रीय समिति बैठकको पहिलो दिन महामन्त्री गगन थापाले प्रस्तुत गरेको प्रतिवेदन एनजीओको विसलिस्टजस्तो भएको बताउनु भएको छ ।
पार्टी मुख्यालय सानेपामा जारी बैठकमा केन्द्रीय सदस्य एवं सभापति शेरबहादुर देउवापत्नी आरजुले महामन्त्रीको प्रतिवेदन राजनीतिक दस्तावेजसहित आउला भन्ठानेकामा त्यो केवल एनजीओको विसलिस्टजस्तो भएको दाबी गर्नुभएको हो ।
उहाँले भन्नुभयो, ‘यसपटक महामन्त्रीको प्रतिवेदनमा कुनै राजनीतिक दस्तावेज आउँछ होला भन्ने सोचेकी थिएँ । तर एनजीओको विसलिस्टजस्तो लाग्यो । कार्यक्रम धेरै गर्ने अनि रिजल्ट के ? योभन्दा दुई–तीन वटा उपलब्धिमूलक कार्यक्रम गरौं र त्यो परिणाममुखी बनाऔं ।’
आरजुले पार्टीले आफ्नो दिशा तय गर्नुपर्ने बताउनुभयो । ‘हामी सुशासनका लागि कति तयार छौं । प्रधानमन्त्रीकी धर्मपत्नी हुँदा के रहेछ भनेर बुझ्दा पार्टीबाट मन्त्री हुनेहरुको सिक्दासिक्दै कार्यकाल सकिँदा रहेछ,’ उहाँले भन्नुभयो । पार्टीको घोषणापत्रसँग सरकारको नीति र नियममा कहाँ मेल खान्छ भनेर हेर्नुपर्ने र त्यहीअनुसार कार्यक्रम गर्नुपर्ने उहाँको सुझाव छ । संगठनका हकमा संख्या बढाएर मात्र केही नहुने आरजुले बताउनुभयो ।
पार्टीको क्रियाशील सदस्यता लिन चाहनेलाई प्रशिक्षण दिएर मात्र सदस्यता प्रमाणित गर्नुपर्ने उहाँको सुझाव छ । उहाँले भन्नुभयो , ’प्रशिक्षण सञ्चालन गर्नुपर्छ । प्रशिक्षणबाट पार्टी के हो, पार्टीमा किन लाग्ने भन्ने सबै बुझेपछि मात्रै क्रियाशील सदस्यता दिनुपर्छ।’ नयाँ पार्टीले सदस्यता बढायो भनेर त्यसको पछि दौडिन आवश्यक नभएको पनि उहाँले बताउनुभयो । महिलाका लागि निर्वाचन क्षेत्र छुट्याउनुपर्ने धारणा आरजुले व्यक्त गर्नुभयो ।
