काठमाडौं । वर्षात रोकिएसँगै आगलागी र डढेलोका घटना बढ्न थालेका छन् । हाल देशका १५० ठाउँमा डढेलो लागिरहेको वन डढेलो पहिचान तथा अनुगमन प्रणालीले जनाएको छ । सबैभन्दा धेरै बाँके र सुर्खेतमा डढेलो लागेको छ । बाँकेका ३३ र सुर्खेतका २५ ठाउँमा डढेलो लागिरहेको बताइएको छ ।
कैलालीका ९, सिन्धुली र बर्दियाका ८, कञ्चनपुर र सल्यानका ६, खोटाङ, दाङ र अर्घाखाँचीका ५ ठाउँ, दोलखाका ४, धनकुटा, अछाम, नुवाकोट, कपिलवस्तु, ओखलढुंगा, रामेछाप र स्याङ्जाका ३/३ ठाउँमा डढेलो लागेको छ । मकवानपुर, पर्सा, प्युठान र तेह्रथुमका २/२ ठाउँ तथा तनहुँ, सुनसरी, पाँचथर, काठमाडौं, काभ्रे, गुल्मी र भोजपुरका एक/एक ठाउँमा डढेलो लागिरहेको वन डढेलो पहिचान तथा अनुगमन प्रणालीको भनाइ छ ।
धेरैजसो आगलागी र डढेलो मानवीय लापरबाहीकै कारण लाग्ने भएकाले सचेत हुन र सावधानी अपनाउन विज्ञले आग्रह गरेका छन् । डढेलोका कारण कतिपय स्थानमा मानवीय क्षतिसमेत भइरहेकाले उच्च सतर्कता अपनाउन आग्रह गरिएको छ । डढेलोका कारण बन्यजन्तुको वासस्थानका साथै महत्वपूर्ण जडिबुटी र काठ नस्ट भइरहेको छ ।
