रामेछाप । रामेछाप जोड्ने ३ वटा पक्की पुलको एकै पटक ठेक्का आव्हान भएको छ । डिभिजन सडक कार्यालय खाल्टे सिन्धुलीले सो ठेक्का आव्हान गरेको हो ।
ठेक्का आव्हान भएका तीन मध्ये खुर्कोट र खैरेनीघाट पुल पुनर्निर्माण हुन थालेका हुन् । २०८० साल असोजको बाढीले खुर्कोट र खैरेनीघाटमा निर्माण भएका मोटरेवल पुल बगाएको थियो । अहिले साबिकमा पुल रहेको स्थान या आसपासमा पुल निर्माण गर्ने गरी ठेक्का आव्हान भएको हो । तेस्रो पुल काभ्रे र रामेछाप जोड्ने गरी दोभानटारमा निर्माण गर्न लागिएको हो ।
रामेछापलाई तराई र काठमाडौंसँग जोड्न खुर्कोटको पुल २०८० असोज १२ गते बगाए पछि तत्काल बेलिब्रिज जडान गरिएको थियो । खैरेनीमा भने हालै मात्र बेलीब्रिज निर्माण गरिएको हो ।
डिजाइन एन्ड विल्ड प्रकृतिको उक्त ठेक्कामा निर्माण व्यवसायीले पुल निर्माण गर्ने स्थानको चयन, डिजाइन र लागत अनुमान आफैले गर्नुपर्नेछ ।
खुर्कोटमा हाल रहेको पुल आसपासको क्षेत्रमा पुल निर्माण हुने बताइएको छ भने भए पनि खैरेनीघाटमा भने अहिले पुल भएको ठाउँ सुनकोसी नदी र रोशीखोलाको किनारमा भएको कारण केही तल सार्ने तयारी भएको छ । सिन्धुलीको दुम्जा नजिकको टुप्पिडाडाँमा एका तर्फको जग हुने गरी पुल बनाउने चर्चा छ ।
खुर्कोटमा बेलिब्रिज मात्रै हुँदा तराईबाट रामेछाप, दोलखा, ओखलढुङ्गा र सोलु सामान लिएर जाने ठुला सवारी साधनहरू सामान खन्याएर जाने गरेका छन् । सो पुलको भारवहन क्षमता काम हुँदा व्यवसायीले झन्झट बेहोर्नु परेको छ ।
