काठमाडौँ । सोमबार राजधानी लगायत देशका विभिन्न ठाउँमा आयोजित जेन जी पुस्ताको आन्दोलनमा सरकारले गरेको दमनका क्रममा दर्जनभन्दा बढी युवाहरूको हत्या गरेपछि शैक्षिक हड्तालको घोषणा गरिएको छ । सामाजिक सञ्जाल प्रतिबन्ध र भ्रष्टाचारको विरोधमा सुरु भएको आन्दोलनमा प्रहरीले अनावश्यक बल प्रयोग गरेको थियो ।
आन्दोलनको संयोजन गरिरहेको हामी नेपाली समूहले भनेको छ, “आज हाम्रो देशले नसोचेको कुराको साक्षी बन्नु पर्यो । स्कुल युनिफर्ममै रहेका विद्यार्थीहरूलाई बर्बरपूर्ण तरिकाले मारिएको छ । हामी शान्तिपूर्ण प्रदर्शनका लागि एक ठाउँमा आएका थियौँ । तर सरकारले युवाहरलाई सुन्नुको सट्टा हिंसामार्फत हाम्रो आबाज नै दबाउने तर्फ अघि बढ्यो ।”
जेन जीले भोलिदेखि कक्षामा कुनै पनि विद्यार्थी सहभागी नहुने र सम्पूर्ण स्कुल, कलेज र विश्वविद्यालय अनिश्चित कालका बन्द हुने घोषणा गरेका छन् । “यो केवल हडताल मात्र होइन, यो एउटा अडान हो । बर्बरता विरुद्धको एउटा अडान । न्यायका लागि अडान हो । अनि नेपाली युवाहरूको भविष्य रक्षाको अडान हो ।”
आत्मसमर्पण अस्वीकार्य रहेको भन्दै जेन जीले युवाहरूलाई बेवास्ता गरिरहने स्थितिको अन्त्य हुनुपर्ने कुराको सुनिश्चितता खोजेको छ । “यी हत्याहरूको स्पष्ट जवाफ सरकारले नदिएसम्म यो बन्द जारी रहनेछ,” जेन जीले भनेको छ ।
